aaKHiri din

hijr se pareshāñ ham

zindagī se ghabrā kar

ḳhāmushī kī chādar meñ

duur tak chale aa.e

shor meñ nikal aa.e

shor ne salīqe se

dhīme dhīme samjhāyā

zindagī ḳhamoshī se

aage kī kahānī hai

chaa.e kī dukānoñ meñ

surma.ī gilāsoñ kī

khaḌkhaḌāhaTeñ aksar

kitnā lutf detī haiñ

shor hī to hai ye bhī

chauk pe khaḌe laḌke

jab kisī latīfe pe

qahqahe lagāte haiñ

tāliyāñ bajāte haiñ

tāliyoñ kī āvāzeñ

shor hī to kartī haiñ

aañkh bāteñ kartī haiñ

dil sadā.eñ detā hai

saañs aatī jaatī hai

ik rhythm sā bantā hai

muḳhtalif dhuneñ bhī to

shor kī zabāneñ haiñ

ab samajh meñ aayā hai

ye udaas sannāTā

shor hī kā hissa hai

ḳhāmushī yā tanhā.ī

muḳhtasar sā qissa hai

so yahī kiyā hai tai

hijr kā tire jānāñ

aaj āḳhirī din hai

kal se is ḳharābe meñ

shor ke do-ābe meñ

naukrī kareñge ham

'āshiqī kareñge ham

shā'irī kareñge ham

hijr se pareshan hum

zindagi se ghabra kar

KHamushi ki chadar mein

dur tak chale aae

shor mein nikal aae

shor ne saliqe se

dhime dhime samjhaya

zindagi KHamoshi se

aage ki kahani hai

chae ki dukanon mein

surmai gilason ki

khaDkhaDahaTen aksar

kitna lutf deti hain

shor hi to hai ye bhi

chauk pe khaDe laDke

jab kisi latife pe

qahqahe lagate hain

taliyan bajate hain

taliyon ki aawazen

shor hi to karti hain

aankh baaten karti hain

dil sadaen deta hai

sans aati jati hai

ek rhythm sa banta hai

muKHtalif dhunen bhi to

shor ki zabanen hain

ab samajh mein aaya hai

ye udas sannaTa

shor hi ka hissa hai

KHamushi ya tanhai

muKHtasar sa qissa hai

so yahi kiya hai tai

hijr ka tere jaanan

aaj aaKHiri din hai

kal se is KHarabe mein

shor ke do-abe mein

naukri karenge hum

'ashiqi karenge hum

sha'iri karenge hum