aaKHiri KHwahish

thī ḳhvāhish kisī kī

ki maiñ zindagī kā

aham vāqi.a

koī chun kar sunā.ūñ

merī fikr ne jab idhar ruḳh kiyā to

ye paayā ki

mushkil baḌī hai

ki ye zindagī to

aham vāqi.oñ kī

musalsal kaḌī hai

idhar bhī juḌī hai

udhar bhī juḌī hai

isī fikr meñ maiñ paḌī rah ga.ī ki

uThā.ūñ kidhar se

aham vāqi.a ik

tasalsul ko is ke

kidhar se maiñ toḌūñ

agar toḌ bhī duuñ

to phir kaise joḌūñ

shurūa kī kaḌī to bahut hī aham thī

use chhū ke dekhā to bilkul narm thī

abhī darmiyāñ tak maiñ

pahuñchī nahīñ thī

ki rangīn kaḌiyāñ

khanakne lagīñ ḳhud

mujhe chhū ke dekho

mujhe chuum lo tum

ki mujh se aham

kuchh nahīñ zindagī meñ

ajab mo.ajiza thā ki

kaḌiyāñ sabhī vo

na āñchal se uljhīñ

na Thahrīñ kahīñ bhī

guzartī rahīñ aur

guzarne se pahle

hasīñ rang apne

atā kar ke mujh ko

mirī hī kalā.ī meñ

ban ban ke kañgan

khanakne lagī thiiñ

tasalsul magar un kā TuuTā nahīñ thā

koī rang bhī un kā jhūTā nahīñ thā

abhī tak to un ko

sañbhāle sañbhāle

guzartī rahī maiñ

sirā āḳhirī jab

mire haath meñ hai

to jī chāhtā hai

mujhe thaam le vo

merī sust-raftāriyoñ ke muqābil

agar vo Thahar na sake

to mirā saath dene kī ḳhātir

vo itnā to kar de

ki mere guzarne se pahle

mirā vaqt aane se pahle

baḌhe

aur

mujhe qaid kar le

thi KHwahish kisi ki

ki main zindagi ka

aham waqia

koi chun kar sunaun

meri fikr ne jab idhar ruKH kiya to

ye paya ki

mushkil baDi hai

ki ye zindagi to

aham waqion ki

musalsal kaDi hai

idhar bhi juDi hai

udhar bhi juDi hai

isi fikr mein main paDi rah gai ki

uThaun kidhar se

aham waqia ek

tasalsul ko is ke

kidhar se main toDun

agar toD bhi dun

to phir kaise joDun

shurua ki kaDi to bahut hi aham thi

use chhu ke dekha to bilkul narm thi

abhi darmiyan tak main

pahunchi nahin thi

ki rangin kaDiyan

khanakne lagin KHud

mujhe chhu ke dekho

mujhe chum lo tum

ki mujh se aham

kuchh nahin zindagi mein

ajab moajiza tha ki

kaDiyan sabhi wo

na aanchal se uljhin

na Thahrin kahin bhi

guzarti rahin aur

guzarne se pahle

hasin rang apne

ata kar ke mujh ko

meri hi kalai mein

ban ban ke kangan

khanakne lagi thin

tasalsul magar un ka TuTa nahin tha

koi rang bhi un ka jhuTa nahin tha

abhi tak to un ko

sanbhaale sanbhaale

guzarti rahi main

sira aaKHiri jab

mere hath mein hai

to ji chahta hai

mujhe tham le wo

meri sust-raftariyon ke muqabil

agar wo Thahar na sake

to mera sath dene ki KHatir

wo itna to kar de

ki mere guzarne se pahle

mera waqt aane se pahle

baDhe

aur

mujhe qaid kar le