aaKHiri kos

āḳhirī kos mujhe aaj hī tai karnā hai

aur is lambe safar kā ye kaḌā kos mujhe

is qadar lambā baḌhānā hai ki ab se pahle

jo bhī kuchh guzrā hai maazī meñ use phir ik baar

hāzir-o-nāzir-o-maujūd sā maiñ jhel sakūñ

arsa-e-ġhā.ib-o-ma.adūm se is lamhe tak

vādiyāñ jharne charāgāheñ maveshī panchhī

khet khaliyān chhapar-khaT mire ghar kā dālān

gaañv kī galiyāñ makāñ log dukāneñ bāzār

aur phir shahr kī saḌkeñ basoñ caroñ kā shor

umr baḌhtī huī bachpan se laḌakpan kī taraf

aur laḌakpan kī vo nā-puḳhta bulūġhat jis meñ

mujh ko ehsās huā thā ki koī aur bhī hai

zindagī saarī jise saath mire chalnā hai

kaisā shorīda-sar tūfān thā tuġhyānī thī

jis ne ik bāvle insān ko be-rahmī se

duur anjāne se pardes meñ lā paTḳhā thā

aur phir pā-ba-rikāb aage hī aage kī taraf

sar pe sāmān uThā.e hue banjāroñ sā

DanDī pagDanDī saḌak naql-o-hamal harkat-o-kūch

kaisī āyand-vurūd thī ye muhim jo hijrat

jis meñ sīmāb qadam chaltā rahā huuñ barsoñ

ek kos aur mujhe aaj kī shab chalnā hai

aur is raat faqat apnī hī sohbat meñ agar

jo bhī maiñ bhog chukā huuñ use sahbā kī tarah

āḳhirī kos ke is jaam meñ bhar kar ānand

ek lamha bhī tavaqquf na karūñ haath meñ luuñ

aur ik ghūñT maiñ pī jā.ūñ to merā ye safar

surḳh-rūī se mukammal ho mujhe sair kare

āḳhirī kos mujhe aaj hī tai karnā hai

aaKHiri kos mujhe aaj hi tai karna hai

aur is lambe safar ka ye kaDa kos mujhe

is qadar lamba baDhana hai ki ab se pahle

jo bhi kuchh guzra hai mazi mein use phir ek bar

hazir-o-nazir-o-maujud sa main jhel sakun

arsa-e-ghaib-o-madum se is lamhe tak

wadiyan jharne charagahen maweshi panchhi

khet khaliyan chhapar-khaT mere ghar ka dalan

ganw ki galiyan makan log dukanen bazar

aur phir shahr ki saDken bason caron ka shor

umr baDhti hui bachpan se laDakpan ki taraf

aur laDakpan ki wo na-puKHta bulughat jis mein

mujh ko ehsas hua tha ki koi aur bhi hai

zindagi sari jise sath mere chalna hai

kaisa shorida-sar tufan tha tughyani thi

jis ne ek bawle insan ko be-rahmi se

dur anjaane se pardes mein la paTKHa tha

aur phir pa-ba-rikab aage hi aage ki taraf

sar pe saman uThae hue banjaron sa

DanDi pagDanDi saDak naql-o-hamal harkat-o-kuch

kaisi aayand-wurud thi ye muhim jo hijrat

jis mein simab qadam chalta raha hun barson

ek kos aur mujhe aaj ki shab chalna hai

aur is raat faqat apni hi sohbat mein agar

jo bhi main bhog chuka hun use sahba ki tarah

aaKHiri kos ke is jam mein bhar kar aanand

ek lamha bhi tawaqquf na karun hath mein lun

aur ek ghunT main pi jaun to mera ye safar

surKH-rui se mukammal ho mujhe sair kare

aaKHiri kos mujhe aaj hi tai karna hai