aaKHiri lamha

tum mirī zindagī meñ aa.ī ho

merā ik paañv jab rikāb meñ hai

dil kī dhaḌkan hai Dūbne ke qarīb

saañs har lahza pech-o-tāb meñ hai

TūTte be-ḳharosh tāroñ kī

āḳhirī kapkapī raubāb meñ hai

koī manzil na jāda-e-manzil

rāsta gum kisī sarāb meñ hai

tum ko chāhā kiyā ḳhayāloñ meñ

tum ko paayā bhī jaise ḳhvāb meñ hai

tum mirī zindagī meñ aa.ī ho

merā ik paañv jab rikāb meñ hai

maiñ sochtā thā ki tum aaogī tumheñ pā kar

maiñ is jahān ke dukh-dard bhuul jā.ūñgā

gale meñ Daal ke bāñheñ jo jhuul jāogī

maiñ āsmān ke taare bhī toḌ lā.ūñgā

tum ek bel kī mānind baḌhtī jāogī

na chhū sakeñgī havādis kī āñdhiyāñ tum ko

maiñ apnī jaan pe sau āfateñ uThā lūñgā

chhupā ke rakkhūñgā bāñhoñ ke darmiyāñ tum ko

magar maiñ aaj bahut duur jaane vaalā huuñ

bas aur chand nafas ko tumhāre paas huuñ maiñ

tumheñ jo pā ke ḳhushī hai tum us ḳhushī pe na jaao

tumheñ ye ilm nahīñ kis qadar udaas huuñ maiñ

kyā tum ko ḳhabar is duniyā kī kyā tum ko pata is duniyā kā

ma.asūm diloñ ko dukh denā sheva hai is duniyā kā

ġham apnā nahīñ ġham is kā hai kal jaane tumhārā kyā hogā

parvān chaḌhogī tum kaise jiine kā sahārā kyā hogā

aao ki tarastī bāñhoñ meñ ik baar to tum ko bhar luuñ maiñ

kal tum jo baḌī ho jāogī jab tum ko shu.ūr aa jā.egā

kitne hī savāloñ kā dhārā ehsās se Takrā jā.egā

sochogī ki duniyā tabqoñ meñ taqsīm hai kyuuñ ye pher hai kyā

insān kā insāñ bairī hai ye zulm hai kyā andher hai kyā

ye nasl hai kyā ye zaat hai kyā ye nafrat kī ta.alīm hai kyuuñ

daulat to bahut hai mulkoñ meñ daulat kī magar taqsīm hai kyuuñ

tārīḳh batā.egī tum ko insāñ se kahāñ par bhuul huī

sarmā.e ke hāthoñ logoñ kī kis tarah mohabbat dhuul huī

sadiyoñ se barābar mehnat-kash hālāt se laḌte aa.e haiñ

chhā.ī hai jo ab tak dhartī par us raat se laḌte aa.e haiñ

duniyā se abhī tak miT na sakā par raaj ijāra-dārī kā

ġhurbat hai vahī aflās vahī ronā hai vahī bekārī kā

mehnat kī abhī tak qadr nahīñ mehnat kā abhī tak mol nahīñ

DhūñDe nahīñ miltīñ vo āñkheñ jo āñkheñ ho kashkol nahīñ

sochā thā ki kal is dhartī par ik rañg nayā chhā jā.egā

insān hazār barsoñ kī mehnat kā samar pā jā.egā

jiine kā barābar haq sab ko jab miltā vo pal aa na sakā

jis kal kī ḳhātir jīte-jī marte rahe vo kal aa na sakā

lekin ye laḌā.ī ḳhatm nahīñ ye jañg na hogī band kabhī

sau zaḳhm bhī khā kar maidāñ se haTte nahīñ jur.at-mañd kabhī

vo vaqt kabhī to aa.egā jab dil ke chaman lahrā.eñge

mar jā.ūñ to kyā marne se mire ye ḳhvāb nahīñ mar jā.eñge

ye ḳhvāb hī merī daulat haiñ ye ḳhvāb tumheñ de jā.ūñgā

is dahr meñ jiine marne ke ādāb tumheñ de jā.ūñgā

mumkin hai ki ye duniyā kī ravish pal bhar ko tumhārā saath na de

kāñToñ hī kā tohfa nazr kare phūloñ kī koī sauġhāt na de

mumkin hai tumhāre raste meñ har zulm-o-sitam dīvār bane

siine meñ dahakte sho.ale hoñ har saañs koī āzār bane

aise meñ na khul kar rah jaanā ashkoñ se na āñchal bhar lenā

ġham aap baḌī ik tāqat hai ye tāqat bas meñ kar lenā

ho azm to lau de uThtā hai har zaḳhm sulagte siine kā

jo apnā haq ḳhud chhīn sake miltā hai use haq jiine kā

lekin ye hamesha yaad rahe ik fard kī tāqat kuchh bhī nahīñ

jo bhī ho akele insāñ se duniyā kī baġhāvat kuchh bhī nahīñ

tanhā jo kisī ko pā.eñge tāqat ke shikanje jakḌeñge

sau haath uTheñge jab mil kar duniyā kā garebāñ pakḌeñge

insān vahī hai tābinda us raaz se jis kā siinā hai

auroñ ke liye to jiinā hī ḳhud apne liye bhī jiinā hai

jiine kī har tarah se tamannā hasīn hai

har shar ke bāvajūd ye duniyā hasīn hai

dariyā kī tund baaḌh bhayānak sahī magar

tūfāñ se kheltā huā tinkā hasīn hai

sahrā kā har sukūt Darātā rahe to kyā

jañgal ko kāTtā huā rastā hasīn hai

dil ko hilā.e laakh ghaTāoñ kī ghan-garaj

miTTī pe jo girā hai vo qatra hasīn hai

dahshat dilā rahī haiñ chaTāneñ to kyā huā

patthar meñ jo sanam hai vo kitnā hasīn hai

rātoñ kī tīrgī hai jo pur-haul ġham nahīñ

sub.hoñ kā jhāñktā huā chehra hasīn hai

hoñ laakh kohsār bhī haa.el to kyā huā

pal pal chamak rahā hai jo tesha hasīn hai

lākhoñ sa.ūbatoñ kā agar sāmnā bhī ho

har johd har amal kā taqāzā hasīn hai

chaman se chand hī kāñTe maiñ chun sakā lekin

baḌī hai baat jo tum rañg-e-gul nikhār sako

ye duur daur-e-jahāñ kaash tum ko raas aa.e

tum is zamīn ko kuchh aur bhī sañvār sako

amal tumhārā ye taufīq de sake tum ko

ki zindagī kā har ik qarz tum utaar sako

safar hayāt kā āsān ho hī jaatā hai

agar ho dil ko sahārā kisī kī chāhat kā

vo pyaar jis meñ na ho aql o dil kī yak-jehtī

kisī tarīq se jazba nahīñ mohabbat kā

hazāroñ saal meñ tahzīb-e-jism nikhrī hai

bajā ki jins taqāzā hai ek fitrat kā

tumheñ kal apne sharīk-e-safar ko chunñā hai

vo jis se tum ko mohabbat mile rifāqat bhī

hazār ek hoñ do zehn muḳhtalif hoñge

ye baat talḳh hai lekin hai ain-fitrat bhī

bahut hasīn hai zehnī mufāhamat lekin

baḌī aziim hai ādarsh kī hifāzat bhī

kabhī ye gul bhī nazar ko fareb dete haiñ

har ek phuul meñ tam.īz-e-rañg-o-bū rakhnā

ḳhayāl jis kā guzar-gāh-e-sad-bahārāñ hai

har ik qadam usī manzil kī aarzū rakhnā

koī bhī farz ho ḳhvāhish se phir bhī bartar hai

tamām umr farā.ez kī aabrū rakhnā

tum ek aise gharāne kī laaj ho jis ne

har ek daur ko tahzīb o āgahī dī hai

tamām mantiq o hikmat tamām ilm o adab

charāġh ban ke zamāne ko raushnī dī hai

jilā-vatan hue āzādī-e-vatan ke liye

mare to aise ki auroñ ko zindagī dī hai

ġham-e-hayāt se laḌte guzār dī maiñ ne

magar ye ġham hai tumheñ kuchh ḳhushī na de paayā

vo pyaar jis se laḌakpan ke din mahak uTTheñ

vo pyaar bhī maiñ tumheñ do ghaḌī na de paayā

maiñ jāntā huuñ ki hālāt sāzgār na the

magar maiñ ḳhud ko tasallī kabhī na de paayā

ye merī nazm mirā pyaar hai tumhāre liye

ye sher tum ko mirī ruuh kā patā deñge

yahī tumheñ mire azm o amal kī deñge ḳhabar

yahī tumheñ mirī majbūriyāñ batā deñge

kabhī jo ġham ke añdhere meñ Dagmagāogī

tumhārī raah meñ kitne diye jalā deñge

ab mire paas aur vaqt nahīñ

saañs har lahza iztirāb meñ hai

larzāñ larzāñ koī dhuñdlakā sā

Dūbte zard āftāb meñ hai

maut ko kis liye hijāb kaheñ

kis ko ma.alūm kyā hijāb meñ hai

jism-o-jāñ kā ye aarzī rishta

kitnā miltā huā hubāb meñ hai

aaj jo hai vo kal nahīñ hogā

aadmī kaun se hisāb meñ hai

ḳhud zamāne badalte rahte haiñ

zindagī sirf inqalāb meñ hai

aao āñkhoñ meñ Daal do āñkheñ

ruuh ab naza.a ke azaab meñ hai

thartharātā huā tumhārā aks

kab se is dīda-e-pur-āb meñ hai

raushnī der se āñkhoñ kī bujhī jaatī hai

Thiik se kuchh bhī dikhā.ī nahīñ detā mujh ko

ek chehrā mire chehre pe jhukā aatā hai

kaun hai ye bhī sujhā.ī nahīñ detā mujh ko

sirf sannāTe kī āvāz chalī aatī hai

aur to kuchh bhī sunā.ī nahīñ detā mujh ko

aao us chāñd se māthe ko zarā chuum to luuñ

phir na hogā tumheñ ye pyaar nasīb aa jaao

āḳhirī lamha hai siine pe mire sar rakh do

dil kī hālat huī jaatī hai ajiib aa jaao

na aizza na ahibbā na ḳhudā hai na rasūl

koī is vaqt nahīñ mere qarīb aa jaao

tum to qarīb aa jaao!

tum meri zindagi mein aai ho

mera ek panw jab rikab mein hai

dil ki dhaDkan hai Dubne ke qarib

sans har lahza pech-o-tab mein hai

TuTte be-KHarosh taron ki

aaKHiri kapkapi raubab mein hai

koi manzil na jada-e-manzil

rasta gum kisi sarab mein hai

tum ko chaha kiya KHayalon mein

tum ko paya bhi jaise KHwab mein hai

tum meri zindagi mein aai ho

mera ek panw jab rikab mein hai

main sochta tha ki tum aaogi tumhein pa kar

main is jahan ke dukh-dard bhul jaunga

gale mein Dal ke banhen jo jhul jaogi

main aasman ke tare bhi toD launga

tum ek bel ki manind baDhti jaogi

na chhu sakengi hawadis ki aandhiyan tum ko

main apni jaan pe sau aafaten uTha lunga

chhupa ke rakkhunga banhon ke darmiyan tum ko

magar main aaj bahut dur jaane wala hun

bas aur chand nafas ko tumhaare pas hun main

tumhein jo pa ke KHushi hai tum us KHushi pe na jao

tumhein ye ilm nahin kis qadar udas hun main

kya tum ko KHabar is duniya ki kya tum ko pata is duniya ka

masum dilon ko dukh dena shewa hai is duniya ka

gham apna nahin gham is ka hai kal jaane tumhaara kya hoga

parwan chaDhogi tum kaise jine ka sahaara kya hoga

aao ki tarasti banhon mein ek bar to tum ko bhar lun main

kal tum jo baDi ho jaogi jab tum ko shuur aa jaega

kitne hi sawalon ka dhaara ehsas se Takra jaega

sochogi ki duniya tabqon mein taqsim hai kyun ye pher hai kya

insan ka insan bairi hai ye zulm hai kya andher hai kya

ye nasl hai kya ye zat hai kya ye nafrat ki talim hai kyun

daulat to bahut hai mulkon mein daulat ki magar taqsim hai kyun

tariKH bataegi tum ko insan se kahan par bhul hui

sarmae ke hathon logon ki kis tarah mohabbat dhul hui

sadiyon se barabar mehnat-kash haalat se laDte aae hain

chhai hai jo ab tak dharti par us raat se laDte aae hain

duniya se abhi tak miT na saka par raj ijara-dari ka

ghurbat hai wahi aflas wahi rona hai wahi bekari ka

mehnat ki abhi tak qadr nahin mehnat ka abhi tak mol nahin

DhunDe nahin miltin wo aankhen jo aankhen ho kashkol nahin

socha tha ki kal is dharti par ek rang naya chha jaega

insan hazar barson ki mehnat ka samar pa jaega

jine ka barabar haq sab ko jab milta wo pal aa na saka

jis kal ki KHatir jite-ji marte rahe wo kal aa na saka

lekin ye laDai KHatm nahin ye jang na hogi band kabhi

sau zaKHm bhi kha kar maidan se haTte nahin jurat-mand kabhi

wo waqt kabhi to aaega jab dil ke chaman lahraenge

mar jaun to kya marne se mere ye KHwab nahin mar jaenge

ye KHwab hi meri daulat hain ye KHwab tumhein de jaunga

is dahr mein jine marne ke aadab tumhein de jaunga

mumkin hai ki ye duniya ki rawish pal bhar ko tumhaara sath na de

kanTon hi ka tohfa nazr kare phulon ki koi saughat na de

mumkin hai tumhaare raste mein har zulm-o-sitam diwar bane

sine mein dahakte shoale hon har sans koi aazar bane

aise mein na khul kar rah jaana ashkon se na aanchal bhar lena

gham aap baDi ek taqat hai ye taqat bas mein kar lena

ho azm to lau de uThta hai har zaKHm sulagte sine ka

jo apna haq KHud chhin sake milta hai use haq jine ka

lekin ye hamesha yaad rahe ek fard ki taqat kuchh bhi nahin

jo bhi ho akele insan se duniya ki baghawat kuchh bhi nahin

tanha jo kisi ko paenge taqat ke shikanje jakDenge

sau hath uThenge jab mil kar duniya ka gareban pakDenge

insan wahi hai tabinda us raaz se jis ka sina hai

auron ke liye to jina hi KHud apne liye bhi jina hai

jine ki har tarah se tamanna hasin hai

har shar ke bawajud ye duniya hasin hai

dariya ki tund baDh bhayanak sahi magar

tufan se khelta hua tinka hasin hai

sahra ka har sukut Daraata rahe to kya

jangal ko kaTta hua rasta hasin hai

dil ko hilae lakh ghaTaon ki ghan-garaj

miTTi pe jo gira hai wo qatra hasin hai

dahshat dila rahi hain chaTanen to kya hua

patthar mein jo sanam hai wo kitna hasin hai

raaton ki tirgi hai jo pur-haul gham nahin

subhon ka jhankta hua chehra hasin hai

hon lakh kohsar bhi hael to kya hua

pal pal chamak raha hai jo tesha hasin hai

lakhon saubaton ka agar samna bhi ho

har johd har amal ka taqaza hasin hai

chaman se chand hi kanTe main chun saka lekin

baDi hai baat jo tum rang-e-gul nikhaar sako

ye dur daur-e-jahan kash tum ko ras aae

tum is zamin ko kuchh aur bhi sanwar sako

amal tumhaara ye taufiq de sake tum ko

ki zindagi ka har ek qarz tum utar sako

safar hayat ka aasan ho hi jata hai

agar ho dil ko sahaara kisi ki chahat ka

wo pyar jis mein na ho aql o dil ki yak-jehti

kisi tariq se jazba nahin mohabbat ka

hazaron sal mein tahzib-e-jism nikhri hai

baja ki jins taqaza hai ek fitrat ka

tumhein kal apne sharik-e-safar ko chunna hai

wo jis se tum ko mohabbat mile rifaqat bhi

hazar ek hon do zehn muKHtalif honge

ye baat talKH hai lekin hai ain-fitrat bhi

bahut hasin hai zehni mufahamat lekin

baDi azim hai aadarsh ki hifazat bhi

kabhi ye gul bhi nazar ko fareb dete hain

har ek phul mein tamiz-e-rang-o-bu rakhna

KHayal jis ka guzar-gah-e-sad-bahaaran hai

har ek qadam usi manzil ki aarzu rakhna

koi bhi farz ho KHwahish se phir bhi bartar hai

tamam umr faraez ki aabru rakhna

tum ek aise gharane ki laj ho jis ne

har ek daur ko tahzib o aagahi di hai

tamam mantiq o hikmat tamam ilm o adab

charagh ban ke zamane ko raushni di hai

jila-watan hue aazadi-e-watan ke liye

mare to aise ki auron ko zindagi di hai

gham-e-hayat se laDte guzar di main ne

magar ye gham hai tumhein kuchh KHushi na de paya

wo pyar jis se laDakpan ke din mahak uTThen

wo pyar bhi main tumhein do ghaDi na de paya

main jaanta hun ki haalat sazgar na the

magar main KHud ko tasalli kabhi na de paya

ye meri nazm mera pyar hai tumhaare liye

ye sher tum ko meri ruh ka pata denge

yahi tumhein mere azm o amal ki denge KHabar

yahi tumhein meri majburiyan bata denge

kabhi jo gham ke andhere mein Dagmagaogi

tumhaari rah mein kitne diye jala denge

ab mere pas aur waqt nahin

sans har lahza iztirab mein hai

larzan larzan koi dhundlaka sa

Dubte zard aaftab mein hai

maut ko kis liye hijab kahen

kis ko malum kya hijab mein hai

jism-o-jaan ka ye aarzi rishta

kitna milta hua hubab mein hai

aaj jo hai wo kal nahin hoga

aadmi kaun se hisab mein hai

KHud zamane badalte rahte hain

zindagi sirf inqalab mein hai

aao aankhon mein Dal do aankhen

ruh ab naza ke azab mein hai

thartharaata hua tumhaara aks

kab se is dida-e-pur-ab mein hai

raushni der se aankhon ki bujhi jati hai

Thik se kuchh bhi dikhai nahin deta mujh ko

ek chehra mere chehre pe jhuka aata hai

kaun hai ye bhi sujhai nahin deta mujh ko

sirf sannaTe ki aawaz chali aati hai

aur to kuchh bhi sunai nahin deta mujh ko

aao us chand se mathe ko zara chum to lun

phir na hoga tumhein ye pyar nasib aa jao

aaKHiri lamha hai sine pe mere sar rakh do

dil ki haalat hui jati hai ajib aa jao

na aizza na ahibba na KHuda hai na rasul

koi is waqt nahin mere qarib aa jao

tum to qarib aa jao!