aaKHiri mausam

zamāñ makāñ ke hazār hañgāme qalb-e-ḳhasta ko is tarah Dher kar ga.e haiñ

ki jaise ik ḳhushk ḳhushk patte kī kapkapātī huī ragoñ se

chipak rahī ho tamām māhaul ke manāzir kī māñdgī bhī

har ek jhoñke kī ḳhastagī bhī

ye ḳhushk patta

havā ke mab.hūt dā.eroñ meñ zamīn se sar paTak ke apnī tamām rañgat badal chukā hai

ab ek patthar ke yaḳh-zada aur siyāh siine pe aa ke behosh ho gayā hai

maiñ qalb-e-ḳhasta ko le ke sañgīn daur ke farsh par paḌā huuñ

magar yakāyak kuchh aise chauñkāyā qalb-e-ḳhasta ko ek ḳhvāb-e-hasīñ ne aa kar

ki jaise bārish kā pahlā qatra

kuchh itnī shiddat se ḳhushk patte pe aa gire us ko toḌ Daale

zaman makan ke hazar hangame qalb-e-KHasta ko is tarah Dher kar gae hain

ki jaise ek KHushk KHushk patte ki kapkapati hui ragon se

chipak rahi ho tamam mahaul ke manazir ki mandgi bhi

har ek jhonke ki KHastagi bhi

ye KHushk patta

hawa ke mabhut daeron mein zamin se sar paTak ke apni tamam rangat badal chuka hai

ab ek patthar ke yaKH-zada aur siyah sine pe aa ke behosh ho gaya hai

main qalb-e-KHasta ko le ke sangin daur ke farsh par paDa hun

magar yakayak kuchh aise chaunkaya qalb-e-KHasta ko ek KHwab-e-hasin ne aa kar

ki jaise barish ka pahla qatra

kuchh itni shiddat se KHushk patte pe aa gire us ko toD Dale