aanch

zindagī-bhar ke ġhalat a.amāl kī pādāsh meñ

dī ga.ī āḳhir use nār-e-jahannam kī sazā

do farishte us ko chhoḌ aa.e jahannam-zār meñ

chār-sū ik aag kā tūfān thā jis meñ bapā

nāzim-e-dozaḳh ne agle roz jab dekhā use

de rahā thā vo maze se taav apnī mūñchh ko

be-niyāz-e-ātish-e-sozāñ thā vo mard-e-ajīb

us kī āñkhoñ meñ na thā koī nishān-e-iztirāb

koī saayā karb kā chehre pe lahrātā na thā

jaise bargad ke ghane saa.e meñ baiThā ho koī

aisī hiddat meñ pasīna tak use aatā na thā

nāzim-e-dozaḳh ne hairat meñ kiyā us se savāl

baat kyā hai kuchh asar is aag kā tujh par nahīñ

dekh kar terī girāñ-jānī bahut hairāñ huuñ maiñ

tujh ko sho.aloñ kī harārat kā zarā bhī Dar nahīñ

hañs ke vo bolā ki sāhab ye bhī koī aag hai

mere jism-o-jāñ ko is kī aañch kyā pighlā.egī

zindagī-bhar maiñ hasad kī aag meñ jaltā rahā

mujh par ab nār-e-jahannam kyā asar dikhlā.egī

zindagi-bhar ke ghalat aamal ki padash mein

di gai aaKHir use nar-e-jahannam ki saza

do farishte us ko chhoD aae jahannam-zar mein

chaar-su ek aag ka tufan tha jis mein bapa

nazim-e-dozaKH ne agle roz jab dekha use

de raha tha wo maze se taw apni munchh ko

be-niyaz-e-atish-e-sozan tha wo mard-e-ajib

us ki aankhon mein na tha koi nishan-e-iztirab

koi saya karb ka chehre pe lahraata na tha

jaise bargad ke ghane sae mein baiTha ho koi

aisi hiddat mein pasina tak use aata na tha

nazim-e-dozaKH ne hairat mein kiya us se sawal

baat kya hai kuchh asar is aag ka tujh par nahin

dekh kar teri giran-jaani bahut hairan hun main

tujh ko shoalon ki hararat ka zara bhi Dar nahin

hans ke wo bola ki sahab ye bhi koi aag hai

mere jism-o-jaan ko is ki aanch kya pighlaegi

zindagi-bhar main hasad ki aag mein jalta raha

mujh par ab nar-e-jahannam kya asar dikhlaegi