aane wale musannifin ke nam

ek ruq.a likheñ

aur yuuñ likheñ

ham to apne daur kī be-rangiyoñ bad-ahdiyoñ aur nafratoñ kī

murda tafsīlāt kī zinda kahānī apne ḳhuuñ se likh ga.e

ham kyā kareñ gar apnā ḳhuuñ

kaale badbū-dār qātil zahr hī kī lahr thā

aur ye likheñ hamāre daur meñ

saat rangoñ kī dhanak

kaale kambal oḌhtī thī

ujle ujle chāvaloñ meñ sang-rezoñ kī baḌī bohtāt thī

aur hamāre pairahan aag se katre ga.e the

aur jo thā khaal ke andar pighal kar bah gayā thā

aur likheñ ye bhī ki ham to apnā hissa pā chuke

ab tumhāre vāste

saat rangoñ kī barahna qaus hai

is ko apne taur par jab kabhī tartīb denā ḳhuun ke ik rang ko

chhoḌ denā un ke naam

jin kī rag rag kaale badbū-dār qātil zahr se bezār thī

phir bhī use Dhone pe jo majbūr the

jin ko apne jism meñ jaise lahū kī surḳh dhaar

dekhne kā umr bhar armāñ rahā aur jo apne daur kī be-rangiyoñ

kī murda tafsīlāt kī zinda gavāhī dete dete so ga.e

ek ruqa likhen

aur yun likhen

hum to apne daur ki be-rangiyon bad-ahdiyon aur nafraton ki

murda tafsilat ki zinda kahani apne KHun se likh gae

hum kya karen gar apna KHun

kale badbu-dar qatil zahr hi ki lahr tha

aur ye likhen hamare daur mein

sat rangon ki dhanak

kale kambal oDhti thi

ujle ujle chawalon mein sang-rezon ki baDi bohtat thi

aur hamare pairahan aag se katre gae the

aur jo tha khaal ke andar pighal kar bah gaya tha

aur likhen ye bhi ki hum to apna hissa pa chuke

ab tumhaare waste

sat rangon ki barahna qaus hai

is ko apne taur par jab kabhi tartib dena KHun ke ek rang ko

chhoD dena un ke nam

jin ki rag rag kale badbu-dar qatil zahr se bezar thi

phir bhi use Dhone pe jo majbur the

jin ko apne jism mein jaise lahu ki surKH dhaar

dekhne ka umr bhar arman raha aur jo apne daur ki be-rangiyon

ki murda tafsilat ki zinda gawahi dete dete so gae