aane wali nasl ka tohfa

chalo ik va.ada karte haiñ

ki ham aur aap sab bhī

zehn aur dil kī kudūrat saaf karte haiñ

be-īmānī par diyānat kibr par iḳhlās ko

nafratoñ ke zahr par pyaar kī miThās ko

ham ġhālib karte haiñ

chalo ham ye bhī karte haiñ

ki ahl-e-haq ko un kā haq dilāte haiñ

jo mujrim haiñ unheñ mujrim hī kahte haiñ

fareb-o-maslahat ko aap bhī aur ham bhī chhoḌeñ

qadam bosoñ ke bhayānak ġhol ko jo dīmak-o-jarāsīm kī sūrat

nizām-e-fikr-o-fan barbād kartā hai

use ham duur rakhte haiñ use mazmūm kahte haiñ

sunā hai jis zamīñ jis qaum se sachchā.ī jaatī hai

to us ke saath hī īmān aur insāf jaatā hai

to apne taur par in tīnoñ ko ham thāme rakhte haiñ

chalo ham aisā karte haiñ

za.īf-o-tifl ko bahū ko beTiyoñ ko maañ ko ham mushtarka kahte haiñ

dharm aur zaat ke

qasrat-o-qillat ke saare phūloñ ko chun kar

unheñ ḳhush-rañg karte haiñ hasīñ maalā pirote haiñ

chalo ham aisā karte

ye tohfa aane vaalī nasl ko ham pesh karte haiñ

chalo ek wada karte hain

ki hum aur aap sab bhi

zehn aur dil ki kudurat saf karte hain

be-imani par diyanat kibr par iKHlas ko

nafraton ke zahr par pyar ki miThas ko

hum ghaalib karte hain

chalo hum ye bhi karte hain

ki ahl-e-haq ko un ka haq dilate hain

jo mujrim hain unhen mujrim hi kahte hain

fareb-o-maslahat ko aap bhi aur hum bhi chhoDen

qadam boson ke bhayanak ghol ko jo dimak-o-jarasim ki surat

nizam-e-fikr-o-fan barbaad karta hai

use hum dur rakhte hain use mazmum kahte hain

suna hai jis zamin jis qaum se sachchai jati hai

to us ke sath hi iman aur insaf jata hai

to apne taur par in tinon ko hum thame rakhte hain

chalo hum aisa karte hain

zaif-o-tifl ko bahu ko beTiyon ko man ko hum mushtarka kahte hain

dharm aur zat ke

qasrat-o-qillat ke sare phulon ko chun kar

unhen KHush-rang karte hain hasin mala pirote hain

chalo hum aisa karte

ye tohfa aane wali nasl ko hum pesh karte hain