aangan

dar dīvār darīche āñgan

dahlīzeñ dālān aur kamre

saare ruup ye kitne nāzuk

socho to miTTī ke khilaune

mere liye ye kunj-e-ibādat

mere liye ye koh-e-sadāqat

mere liye ye manzil-e-va.ada

ḳhuld-e-tahaffuz qasr-e-rifāqat

jis ke rāj-siñghāsan baiThī

maiñ raanī huuñ maiñ bechārī

bāhar chāhe tūfāñ aa.eñ

lekin yaañ sab chain se so.eñ

jab jāgeñ tab sūraj nikle

so jaa.eñ tab chāñdnī mahke

mere ghar vaale japte haiñ

mere naam kī jai-mālā.eñ

laxmī chhāyā jāneñ mujh ko

sarasvatī sā māneñ mujh ko

chāñd dekh ke mujh ko dekheñ

hariyālī par mujhe chalā.eñ

apnā taḳht aur taaj sambhāle

shaal doshāle kāñdhoñ Daale

baal baal motī pirvā.ūñ!

por por meñ hiire pahnūñ

kām-kāj kā pallū Dāle!

din bhar ghar se uljhūñ suljhūñ

raat ko lekin āñkheñ mūñde

pichhlī rut kā sāvan dekhūñ

hiire la.al bikharte jaa.eñ

mahl do mahle haTte jaa.eñ

chhoTā āñgan nīche kamre!

duur duur se haath hilā.eñ

biite lamhe jugnū aise

uḌte aur chamakte aa.eñ

muTThī bāñdh ke un ko dekhūñ

champā phuul mahakte jaa.eñ

jagmag jagmag sone jaisā

ghar sab kī nazroñ meñ aayā

bhīgā āñchal phailā kājal

kis ne dekhā kis ne chhupāyā

dar diwar dariche aangan

dahlizen dalan aur kamre

sare rup ye kitne nazuk

socho to miTTi ke khilaune

mere liye ye kunj-e-ibaadat

mere liye ye koh-e-sadaqat

mere liye ye manzil-e-wada

KHuld-e-tahaffuz qasr-e-rifaqat

jis ke raj-singhasan baiThi

main rani hun main bechaari

bahar chahe tufan aaen

lekin yan sab chain se soen

jab jagen tab suraj nikle

so jaen tab chandni mahke

mere ghar wale japte hain

mere nam ki jai-malaen

laxmi chhaya jaanen mujh ko

saraswati sa manen mujh ko

chand dekh ke mujh ko dekhen

hariyali par mujhe chalaen

apna taKHt aur taj sambhaale

shaal doshaale kandhon Dale

baal baal moti pirwaun!

por por mein hire pahnun

kaam-kaj ka pallu Dale!

din bhar ghar se uljhun suljhun

raat ko lekin aankhen munde

pichhli rut ka sawan dekhun

hire lal bikharte jaen

mahl do mahle haTte jaen

chhoTa aangan niche kamre!

dur dur se hath hilaen

bite lamhe jugnu aise

uDte aur chamakte aaen

muTThi bandh ke un ko dekhun

champa phul mahakte jaen

jagmag jagmag sone jaisa

ghar sab ki nazron mein aaya

bhiga aanchal phaila kajal

kis ne dekha kis ne chhupaya