aansu

ai mire aañsū kabhī be-kār ho jaatā hai tū

aur kabhī dāman pe ban jaatā hai ik naqsh-e-vafā

terī qīmat kuchh nahīñ rahtī hai nazroñ meñ kabhī

aur kabhī ho jaatā hai ganj-hā-e-be-bahā

parvarish paatā hai tū qalb-e-hazīñ meñ is tarah

jis tarah chashm-e-sadaf meñ gauhar-e-sarmāya-dār

tere siine meñ haiñ pinhāñ rāz-hā-e-ranj-o-ġham

tū hai pichhlī kaif-parvar sohbatoñ kā yādgār

tū kabhī ban jaatā hai phūloñ meñ qatra os kā

aur kabhī tārīk bādal meñ sitāre kī ziyā

jalva-gar hotā hai tū bijlī ke pahlū meñ kabhī

aur kabhī tū ḳhud hī ban jaatā hai sho.ala qahr kā

dekh kar tujh ko kabhī hotā hai siina ġham se shaq

aur kabhī āñkhoñ meñ ban jaatā hai tū vaj.h-e-nashāt

tarjumān-e-hāl-e-dil hai ġham kī ḳhāmoshī meñ tū

ik samundar hai agar hāsil ho tujh ko imbisāt

tū hī mazlūmoñ kī fariyādoñ kā hai fariyād-ras

ġham ke sho.aloñ ko bujhā detā hai dil meñ aa ke tū

ḳhatm ho jaatī hai kulfat terī tuġhyānī ke saath

naġhma-e-ishrat sunā detā hai dil meñ aa ke tū

ai mere aansu kabhi be-kar ho jata hai tu

aur kabhi daman pe ban jata hai ek naqsh-e-wafa

teri qimat kuchh nahin rahti hai nazron mein kabhi

aur kabhi ho jata hai ganj-ha-e-be-baha

parwarish pata hai tu qalb-e-hazin mein is tarah

jis tarah chashm-e-sadaf mein gauhar-e-sarmaya-dar

tere sine mein hain pinhan raaz-ha-e-ranj-o-gham

tu hai pichhli kaif-parwar sohbaton ka yaadgar

tu kabhi ban jata hai phulon mein qatra os ka

aur kabhi tarik baadal mein sitare ki ziya

jalwa-gar hota hai tu bijli ke pahlu mein kabhi

aur kabhi tu KHud hi ban jata hai shoala qahr ka

dekh kar tujh ko kabhi hota hai sina gham se shaq

aur kabhi aankhon mein ban jata hai tu wajh-e-nashat

tarjuman-e-haal-e-dil hai gham ki KHamoshi mein tu

ek samundar hai agar hasil ho tujh ko imbisat

tu hi mazlumon ki fariyaadon ka hai fariyaad-ras

gham ke shoalon ko bujha deta hai dil mein aa ke tu

KHatm ho jati hai kulfat teri tughyani ke sath

naghma-e-ishrat suna deta hai dil mein aa ke tu