aap kaun

ajiib sī ye baat hai

ki jo mirā yaqīn thā

jo tapte rāstoñ meñ mere vāste guloñ kī sar-zamīn thā

ki jo mirā gumān thā

jo abr thā mire liye jo merā āsmān thā

jo merī ibtidā thā aur mirā jo iḳhtitām thā

jo merī sub.h-e-zindagī jo merā āsmān thā

azal se jo abad talak vafā kā sā.ebān thā

bahut hī mehrbān thā

jo markaz-e-nigāh thā

jo merī bārgāh thā

vo ek din milā mujhe bahut hī tez dhuup meñ

ik ajnabī ke ruup meñ

vo hijr meñ base hue se māh-o-sāl de gayā

chalā gayā magar mujhe vo ik savāl de gayā

maiñ sochtī huuñ aaj bhī

rukā thā sun ke chaap kaun

jo kah rahā thā aap kaun

ajib si ye baat hai

ki jo mera yaqin tha

jo tapte raston mein mere waste gulon ki sar-zamin tha

ki jo mera guman tha

jo abr tha mere liye jo mera aasman tha

jo meri ibtida tha aur mera jo iKHtitam tha

jo meri subh-e-zindagi jo mera aasman tha

azal se jo abad talak wafa ka saeban tha

bahut hi mehrban tha

jo markaz-e-nigah tha

jo meri bargah tha

wo ek din mila mujhe bahut hi tez dhup mein

ek ajnabi ke rup mein

wo hijr mein base hue se mah-o-sal de gaya

chala gaya magar mujhe wo ek sawal de gaya

main sochti hun aaj bhi

ruka tha sun ke chap kaun

jo kah raha tha aap kaun