aas

shab ke āvāra-gard shahzāde

jā chhupe apnī ḳhvāb-gāhoñ meñ

paḌ ga.e haiñ gulābī Dore se

raat kī shabnamī nigāhoñ meñ

siim tan apsarāoñ ke jhurmuT

mahv-e-parvāz haiñ fazāoñ meñ

rāt-rānī kī dil-nashīñ ḳhushbū

ghul ga.ī manchalī havāoñ meñ

jhiil kī be-qarār jal-pariyāñ

aa ke sāhil ko chuum jaatī haiñ

dam-ba-dam merī Dūbtī nazreñ

terī rāhoñ pe ghuum jaatī haiñ

muntazir hai udaas pagDanDī

ek sañgīt rez aahaT kī

raah taktī haiñ adh-khulī kaliyāñ

terī ma.asūm muskurāhaT kī

jaane kitne hī rat-jage biite

ārzūoñ kī narm jānoñ par

so ga.e thak ke dard ke maare

aas kī khurdurī chaTānoñ par

shab ke aawara-gard shahzade

ja chhupe apni KHwab-gahon mein

paD gae hain gulabi Dore se

raat ki shabnami nigahon mein

sim tan apsaraon ke jhurmuT

mahw-e-parwaz hain fazaon mein

raat-rani ki dil-nashin KHushbu

ghul gai manchali hawaon mein

jhil ki be-qarar jal-pariyan

aa ke sahil ko chum jati hain

dam-ba-dam meri Dubti nazren

teri rahon pe ghum jati hain

muntazir hai udas pagDanDi

ek sangit rez aahaT ki

rah takti hain adh-khuli kaliyan

teri masum muskurahaT ki

jaane kitne hi rat-jage bite

aarzuon ki narm jaanon par

so gae thak ke dard ke mare

aas ki khurduri chaTanon par