aawazen

aa gayā vaqt yāroñ ko āvāz deñ

ziist ke jāñ-nisāroñ ko āvāz deñ

apnā sāthī vahī hai jo mazlūm hai

ġham-zadoñ dil-figāroñ ko āvāz deñ

aaj phir ham banā kar chaleñ kārvāñ

aao phir rahguzāroñ ko āvāz deñ

phūñk deñ phir ragoñ meñ harārat na.ī

zindagī ke sharāroñ ko āvāz deñ

ham ko tūfāñ Dubo de ye āsāñ nahīñ

sāthiyo ab kināroñ ko āvāz deñ

aaj phir ham añdhere ko lalkār deñ

aaj phir chāñd-tāroñ ko āvāz deñ

tā-ba-ke zindagī ho ḳhizāñ hī ḳhizāñ

kyoñ na ab ham bahāroñ ko āvāz deñ

rāste manzileñ muntazir haiñ sabhī

ziist ke shahsavāroñ ko āvāz deñ

sub.h-e-nau kī taraf chal paḌeñ baḌh chaleñ

sub.h-e-nau kī bahāroñ ko āvāz deñ

aa gaya waqt yaron ko aawaz den

zist ke jaan-nisaron ko aawaz den

apna sathi wahi hai jo mazlum hai

gham-zadon dil-figaron ko aawaz den

aaj phir hum bana kar chalen karwan

aao phir rahguzaron ko aawaz den

phunk den phir ragon mein hararat nai

zindagi ke shararon ko aawaz den

hum ko tufan Dubo de ye aasan nahin

sathiyo ab kinaron ko aawaz den

aaj phir hum andhere ko lalkar den

aaj phir chand-taron ko aawaz den

ta-ba-ke zindagi ho KHizan hi KHizan

kyon na ab hum bahaaron ko aawaz den

raste manzilen muntazir hain sabhi

zist ke shahsawaron ko aawaz den

subh-e-nau ki taraf chal paDen baDh chalen

subh-e-nau ki bahaaron ko aawaz den