abdiyat

aur phir donoñ fānūs siine ke bujh jā.eñge

oḌh legī dhuāñ

duudh kī dhaar kī tarah ujlī nazar

nāḳhun-e-pā se zulfoñ ke bādal talak

jagmagātī huī khaal se

ḳhvāhishoñ ke pur-asrār mahmil talak

ek tahrīr likhegī dīmak

fanā

har taraf be-hisī

tīrgī tīrgī

haañ magar sirf ruḳhsār o lab

sirf ruḳhsār o lab raakh meñ daabī chiñgāriyoñ kī tarah

jagmagā.eñge

un par mire aur tire garm bosoñ kī tahrīr hai

zindagī

aur phir

vaqt kī lamha lamha ubhartī huī saḳht dīvār gir jā.egī

aur apne badan

aur māmūlī nāmoñ meñ tahlīl ho jā.eñge

nuur kā peḌ ban jā.eñge

aane vaale na.e mausamoñ kī havā

ho ke shāḳhoñ se guzregī aur

āsmānī sadāoñ meñ gaayā huā

ek lā-fānī o be-karāñ giit gūñjegā

aur gūñjtā hī rahegā sadā

aur gūñjtā hī rahegā sadā

aur phir donon fanus sine ke bujh jaenge

oDh legi dhuan

dudh ki dhaar ki tarah ujli nazar

naKHun-e-pa se zulfon ke baadal talak

jagmagati hui khaal se

KHwahishon ke pur-asrar mahmil talak

ek tahrir likhegi dimak

fana

har taraf be-hisi

tirgi tirgi

han magar sirf ruKHsar o lab

sirf ruKHsar o lab rakh mein dabi chingariyon ki tarah

jagmagaenge

un par mere aur tere garm boson ki tahrir hai

zindagi

aur phir

waqt ki lamha lamha ubharti hui saKHt diwar gir jaegi

aur apne badan

aur mamuli namon mein tahlil ho jaenge

nur ka peD ban jaenge

aane wale nae mausamon ki hawa

ho ke shaKHon se guzregi aur

aasmani sadaon mein gaya hua

ek la-fani o be-karan git gunjega

aur gunjta hi rahega sada

aur gunjta hi rahega sada