abhishap

hazāroñ saal biite

mirī zarḳhez dhartī ke singhāsan par

birāje devtāoñ ke sarāpe sāñvle the

magar us vaqt bhī kuchh husn kā me.aar ūñchā thā

himāla kī hasīñ beTī unheñ bhaa.ī

brindāban kī dhartī par

thiraktī nāchtī rādhā

basī thī kirshn ke dil meñ

unheñ bhī husn kī man-mohnī mūrat pasand aa.ī

magar un ko ḳhudā hote hue bhī ye ḳhabar kab thī

ki un kī aane vaalī nasl par un kā sarāpā

bahut gahrā asar hai chhoḌne vaalā

hazāroñ saal biite

magar ab bhī hamārī sāñvlī rañgat

tirā vardān ho goyā

hamārā ham-safar bhī kisī paaro

kisī rādhā kā andhā ḳhvāb

āñkhoñ meñ basā.e

liye kashkol hāthoñ meñ

phire bastī kī galiyoñ meñ

ham ab kis zo.am meñ puujā kī thālī meñ

diye rakh kar

tirī chaukhaT pe aa.eñ

sar jhukā.eñ

utāreñ aartī terī

hamāre baḳht par terā ye shyāmal rañg

ik aaseb kī sūrat musallat hai

ham ab to Dar ke maare

ā.inoñ se muñh chhupā.e phir rahe haiñ

hazaron sal bite

meri zarKHez dharti ke singhasan par

biraje dewtaon ke sarape sanwle the

magar us waqt bhi kuchh husn ka mear uncha tha

himala ki hasin beTi unhen bhai

brindaban ki dharti par

thirakti nachti radha

basi thi kirshn ke dil mein

unhen bhi husn ki man-mohni murat pasand aai

magar un ko KHuda hote hue bhi ye KHabar kab thi

ki un ki aane wali nasl par un ka sarapa

bahut gahra asar hai chhoDne wala

hazaron sal bite

magar ab bhi hamari sanwli rangat

tera wardan ho goya

hamara ham-safar bhi kisi paro

kisi radha ka andha KHwab

aankhon mein basae

liye kashkol hathon mein

phire basti ki galiyon mein

hum ab kis zoam mein puja ki thaali mein

diye rakh kar

teri chaukhaT pe aaen

sar jhukaen

utaren aarti teri

hamare baKHt par tera ye shyamal rang

ek aaseb ki surat musallat hai

hum ab to Dar ke mare

aainon se munh chhupae phir rahe hain