abr-o-baad

ye bādaloñ kā tanaffus ye sard sard havā

ye sansanātī havā.eñ ye bolte hue saaz

kise ḳhabar thī ki tujh ko pukārte ai dost

inhī fazāoñ meñ kho jā.egī mirī āvāz

kise ḳhabar thī ki is rang-o-bū ke tūfāñ meñ

gul-o-saman ke safīne bhī Duub jā.eñge

thapak ke jin ko sulā.egī rāt-bhar shabnam

vo ġhunche sub.h kī lau se bhī kapkapā.eñge

tujhe bhī yaad hai in badliyoñ ke saa.e meñ

tirī nigāh se TuuTe haiñ kitne paimāne

magar ye kaun uThā aaj terī mahfil se

sulag rahe haiñ charāġhoñ se duur parvāne

samajh sake to samajh kitnī zulmatoñ ke huzūr

kiyā gayā hai mah-o-āftāb se inkār

liyā hai kitne bahishtoñ se intiqām na pūchh

guloñ ke daam ḳharīde haiñ kitne barq-o-sharār

kahā hai kitnī nigāhoñ ne fī-amānillāh

hue haiñ sākit-o-mabhūt kitne bām-o-dar

uThe haiñ bahr-e-duā kitne kāñpte hue haath

kis ehtimām se bāñdhā gayā hai raḳht-e-safar

karāhte rahe raahī pukārte rahe ḳhizr

Thahar sakā na magar kārvān-e-najm-o-qamar

zamīñ pe ādam-o-havvā ke ḳhuun kā mātam

magar ufuq kī jabīñ par vahī hai nūr-e-sahar

kise ḳhabar mirī ġhurbat mujhe kahāñ le jaa.e

tirā dayār mire rāste meñ aa.e na aa.e

mirī nigāh meñ raqsāñ haiñ saiñkaḌoñ tūfāñ

magar ḳhudā na kare koī mauj tujh ko jagā.e

ġhamoñ kī dhuup se rakkhe tujhe ḳhudā mahfūz

ġhubār-e-vaqt se mailā tirā shabāb na ho

kisī malāl kī be-najm-o-māh rātoñ meñ

ġhurūb terī javānī kā āftāb na ho

ye baadalon ka tanaffus ye sard sard hawa

ye sansanati hawaen ye bolte hue saz

kise KHabar thi ki tujh ko pukarte ai dost

inhi fazaon mein kho jaegi meri aawaz

kise KHabar thi ki is rang-o-bu ke tufan mein

gul-o-saman ke safine bhi Dub jaenge

thapak ke jin ko sulaegi raat-bhar shabnam

wo ghunche subh ki lau se bhi kapkapaenge

tujhe bhi yaad hai in badliyon ke sae mein

teri nigah se TuTe hain kitne paimane

magar ye kaun uTha aaj teri mahfil se

sulag rahe hain charaghon se dur parwane

samajh sake to samajh kitni zulmaton ke huzur

kiya gaya hai mah-o-aftab se inkar

liya hai kitne bahishton se intiqam na puchh

gulon ke dam KHaride hain kitne barq-o-sharar

kaha hai kitni nigahon ne fi-amanillah

hue hain sakit-o-mabhut kitne baam-o-dar

uThe hain bahr-e-dua kitne kanpte hue hath

kis ehtimam se bandha gaya hai raKHt-e-safar

karahte rahe rahi pukarte rahe KHizr

Thahar saka na magar karwan-e-najm-o-qamar

zamin pe aadam-o-hawwa ke KHun ka matam

magar ufuq ki jabin par wahi hai nur-e-sahar

kise KHabar meri ghurbat mujhe kahan le jae

tera dayar mere raste mein aae na aae

meri nigah mein raqsan hain sainkaDon tufan

magar KHuda na kare koi mauj tujh ko jagae

ghamon ki dhup se rakkhe tujhe KHuda mahfuz

ghubar-e-waqt se maila tera shabab na ho

kisi malal ki be-najm-o-mah raaton mein

ghurub teri jawani ka aaftab na ho