actress ka contract

mirā vajūd zindagī kā bhed hai dekh

ye ek hoñT ke sho.ale pe barg-e-gul se ḳharāsh

ye ek jism ke kundan meñ gudgudī se gudāz

ye ek ruuh bhiñche bāzuoñ meñ kheltī lahr!

zarā qarīb to aa dekh tere sāmne haiñ

ye surḳh ras bhare lab jin kī ik jhalak ke liye

kabhī qabīloñ ke dil joshanoñ meñ dhaḌke the

jo tū kahe to yahī hoñT surḳh ras bhare hoñT

tire lahū meñ shagūfe khilā bhī sakte haiñ!

qarīb aa ye badan merī zindagī kā tilism

tirī nigāh kī chiñgāriyoñ kā pyāsā hai

jo tū kahe to yahī narm lahariyā āñchal

yahī naqāb mirī chuTkiyoñ meñ aTkī huī

yahī ridā mirī añgḌā.iyoñ se maskī huī

ye ābshār Dhalānoñ se gir bhī saktī hai

bas ek shart... ye gauhar sutūr-e-dastāvez

zarā koī ye vasīqa raqam kare to sahī

ikā.īyoñ ke udhar jitne dā.ere hoñge!

idhar bhī utne hī aks un barahna sho.aloñ ke

mera wajud zindagi ka bhed hai dekh

ye ek honT ke shoale pe barg-e-gul se KHarash

ye ek jism ke kundan mein gudgudi se gudaz

ye ek ruh bhinche bazuon mein khelti lahr!

zara qarib to aa dekh tere samne hain

ye surKH ras bhare lab jin ki ek jhalak ke liye

kabhi qabilon ke dil joshanon mein dhaDke the

jo tu kahe to yahi honT surKH ras bhare honT

tere lahu mein shagufe khila bhi sakte hain!

qarib aa ye badan meri zindagi ka tilism

teri nigah ki chingariyon ka pyasa hai

jo tu kahe to yahi narm lahariya aanchal

yahi naqab meri chuTkiyon mein aTki hui

yahi rida meri angDaiyon se maski hui

ye aabshaar Dhalanon se gir bhi sakti hai

bas ek shart ye gauhar sutur-e-dastawez

zara koi ye wasiqa raqam kare to sahi

ikaiyon ke udhar jitne daere honge!

idhar bhi utne hi aks un barahna shoalon ke