adhura gyan

bahut se bhed aise haiñ jinheñ merī nazar kā duur tak phailā huā dāman

abhī tak chhū nahīñ paayā

bas ik bikhrāo hai har samt ḳhāl-o-ḳhat anokhe be-jahat be-shakl

jaise sardiyoñ kī raat bārish aur kamre meñ sisakte qumqume

savād-e-zehan par ik jugnuoñ kī lahlahātī fasl kā lahrāo

samā.at kī maiñ kis manzil pe huuñ garajte bādaloñ ke lab muqaffal

diloñ kī dhaḌkanoñ kā sard āhañg musalsal be-sadā bekal

ḳhamoshī niiñd meñ hai shor ko āvāz detī hai

maiñ kis kī shakl meñ huuñ kaun huuñ mujh se merā kyā ta.alluq hai

mire ehsās meñ apnā.iyat ko ġhairiyat se kyā shikāyat hai

kyuuñ shikāyat hai

bahut se bhed aise haiñ

jinheñ merī nazar kā duur tak phailā huā dāman

abhī tak chhū nahīñ paayā

bahut se bhed aise hain jinhen meri nazar ka dur tak phaila hua daman

abhi tak chhu nahin paya

bas ek bikhrao hai har samt KHal-o-KHat anokhe be-jahat be-shakl

jaise sardiyon ki raat barish aur kamre mein sisakte qumqume

sawad-e-zehan par ek jugnuon ki lahlahati fasl ka lahrao

samaat ki main kis manzil pe hun garajte baadalon ke lab muqaffal

dilon ki dhaDkanon ka sard aahang musalsal be-sada bekal

KHamoshi nind mein hai shor ko aawaz deti hai

main kis ki shakl mein hun kaun hun mujh se mera kya talluq hai

mere ehsas mein apnaiyat ko ghairiyat se kya shikayat hai

kyun shikayat hai

bahut se bhed aise hain

jinhen meri nazar ka dur tak phaila hua daman

abhi tak chhu nahin paya