agni pariksha

khulī havā aur ghuTan ke vaqfe

tavīl tar the to phir bhī itne garāñ nahīñ the

magar guzishta ka.ī dinoñ se ye vaqfe goyā simaT chuke haiñ

abhī maiñ jī bhar ke le na paatī huuñ chand sāñseñ hasīñ fazā meñ

ki phir usī vaqfa-e-ghuTan kī saqīl dastak

samā.atoñ ko figār kartī

payām laatī hai mausam-e-habs aur ghuTan ke

maiñ is tasalsul se thak chukī huuñ

ai lam-yazal ai ḳhudā-e-bartar

ye darmiyāñ kī aziyyatoñ ko miTā ke kar de

mire muqaddar meñ mausam-e-gul hameshgī kā

vagarna phir dā.imī habs baḳht kar de

khuli hawa aur ghuTan ke waqfe

tawil tar the to phir bhi itne garan nahin the

magar guzishta kai dinon se ye waqfe goya simaT chuke hain

abhi main ji bhar ke le na pati hun chand sansen hasin faza mein

ki phir usi waqfa-e-ghuTan ki saqil dastak

samaaton ko figar karti

payam lati hai mausam-e-habs aur ghuTan ke

main is tasalsul se thak chuki hun

ai lam-yazal ai KHuda-e-bartar

ye darmiyan ki aziyyaton ko miTa ke kar de

mere muqaddar mein mausam-e-gul hameshgi ka

wagarna phir daimi habs baKHt kar de