ahad-nama-e-imroz

aur phir yuuñ huā

din kā uglā pahar sabz zaitūn kī chhāñv meñ kaaT kar

ibn-e-ādam uThā

apne ik haath meñ saañp aur dūsre haath meñ

ik mamolā liye

arsh kī samt jaate hue

muḌ ke vaadī ke logoñ se us ne kahā

''mujh pe īmān laao ḳhudā mar chukā hai

ye aflāk o āfāq kā baar ab mere shānoñ pe hai

mahr o maah o kavākib sabhī mere āyāt haiñ''

aur vaadī ke logoñ meñ kuchh log daanā the īmān le aa.e

kuchh kashmakash meñ rahe

aur kitne hī aise bhī the jo ḳhud apnī sadāoñ meñ gum

ibn-e-ādam kī āvāz se duur the

aur phir yuuñ huā

chaar āfāq se ik ghanā abr uThā

aur vaadī pe ik sā.ebāñ kī tarah tan gayā

aur zamīñ jaise tapne lagī

aur vaadī ke sab log ghabrā ga.e

aisī āvāz meñ jaise sakrāt meñ saañs kī fasl ko

kāTtā ho koī

ibn-e-ādam ko sab ne pukārā ki

ye maut ke kaale dhakne kī mānind āñkhoñ pe rakkhā huā

abr kaisā hai?

tannūr par ek tāñbe kī thālī kī mānind taptī zamīñ kis liye!

dekh ham log aise larazte haiñ sīnoñ meñ īmān

jaise larazte hoñ

ye kaisā aaseb hai!!

in kī āvāz lauT aa.ī

phir kāñpte tilmilāte dhaḌakte diloñ se ye sab ne sunā

''abr se zahr barsegā

taptī zamīñ aur dahkegī

vaadī kā har ġhuncha mar jā.egā

ḳhaak ke rahm meñ saañs letā huā āfrīnash kā har biij

mar jā.egā''

ye sadā.eñ ufuq-tā-ufuq guuñj uThīñ

aur sab ne sunīñ

un meñ daanā bhī the

jin kī dānā.iyāñ tan-barhana kuñvārī kanīzoñ kī mānind

lab-basta thiiñ

aur vo log bhī in meñ maujūd the

kashmakash jin ke dil kī gunahgār jismoñ ke

ma.asūm bachchoñ kī mānind hairān thī

aur kitne hī vo bhī the

ma.asūmiyat jin kī faulād-paikar ġhulāmoñ kī mānind

maqtūl thī

aur phir yuuñ huā

sab kī nazreñ uThīñ jis taraf

apne ik haath meñ arz-e-mahkūm aur dūsre haath meñ

jauharī bam liye

ibn-e-ādam khaḌā thā kisī ātishīñ peḌ kī chhāñv meñ

nīche vaadī meñ ik shor thā

''vo hamārā ḳhudā ham ko lauTāo

taskīn kī koī sūrat to ho

koī chhat koī saaya koī sā.ebāñ

kuchh to ho jis ke zulmāt meñ chhup ke ham

zindagī kaaT leñ

aur ye abr āñkhoñ se ojhal rahe''

vo hamārā ḳhudā ham ko lauTāo

vaadī kā ye shor baḌhtā rahā

shor kartī huī bhiiḌ meñ vo bhī the

jin ke īmān mazbūt the

aur phir yuuñ huā

ibn-e-ādam ne dekhā ki

vaadī meñ sadiyoñ kā būḌhā ḳhudā phir se maujūd thā

aur phir yun hua

din ka ugla pahar sabz zaitun ki chhanw mein kaT kar

ibn-e-adam uTha

apne ek hath mein sanp aur dusre hath mein

ek mamola liye

arsh ki samt jate hue

muD ke wadi ke logon se us ne kaha

mujh pe iman lao KHuda mar chuka hai

ye aflak o aafaq ka bar ab mere shanon pe hai

mahr o mah o kawakib sabhi mere aayat hain

aur wadi ke logon mein kuchh log dana the iman le aae

kuchh kashmakash mein rahe

aur kitne hi aise bhi the jo KHud apni sadaon mein gum

ibn-e-adam ki aawaz se dur the

aur phir yun hua

chaar aafaq se ek ghana abr uTha

aur wadi pe ek saeban ki tarah tan gaya

aur zamin jaise tapne lagi

aur wadi ke sab log ghabra gae

aisi aawaz mein jaise sakraat mein sans ki fasl ko

kaTta ho koi

ibn-e-adam ko sab ne pukara ki

ye maut ke kale dhakne ki manind aankhon pe rakkha hua

abr kaisa hai?

tannur par ek tanbe ki thaali ki manind tapti zamin kis liye!

dekh hum log aise larazte hain sinon mein iman

jaise larazte hon

ye kaisa aaseb hai!!

in ki aawaz lauT aai

phir kanpte tilmilate dhaDakte dilon se ye sab ne suna

abr se zahr barsega

tapti zamin aur dahkegi

wadi ka har ghuncha mar jaega

KHak ke rahm mein sans leta hua aafrinash ka har bij

mar jaega

ye sadaen ufuq-ta-ufuq gunj uThin

aur sab ne sunin

un mein dana bhi the

jin ki danaiyan tan-barhana kunwari kanizon ki manind

lab-basta thin

aur wo log bhi in mein maujud the

kashmakash jin ke dil ki gunahgar jismon ke

masum bachchon ki manind hairan thi

aur kitne hi wo bhi the

masumiyat jin ki faulad-paikar ghulamon ki manind

maqtul thi

aur phir yun hua

sab ki nazren uThin jis taraf

apne ek hath mein arz-e-mahkum aur dusre hath mein

jauhari bam liye

ibn-e-adam khaDa tha kisi aatishin peD ki chhanw mein

niche wadi mein ek shor tha

wo hamara KHuda hum ko lauTao

taskin ki koi surat to ho

koi chhat koi saya koi saeban

kuchh to ho jis ke zulmat mein chhup ke hum

zindagi kaT len

aur ye abr aankhon se ojhal rahe

wo hamara KHuda hum ko lauTao

wadi ka ye shor baDhta raha

shor karti hui bhiD mein wo bhi the

jin ke iman mazbut the

aur phir yun hua

ibn-e-adam ne dekha ki

wadi mein sadiyon ka buDha KHuda phir se maujud tha