ahd-e-wafa

shikast-e-ġham kā tasavvur ajiib hai lekin

tirī nigāh pe kitnā mujhe bharosa hai

mire junūñ ko na.e āstāñ kī hājat thī

tirī talāsh thī ai jān-e-husn-o-barnā.ī

tujhī ko pā ke mohabbat ne sar uThāyā hai

jabīn-e-nāz pe ab itnī muskurāhaT hai

ki Duub jā.eñge is raushnī meñ vahm-o-gumāñ

maiñ sochtā huuñ ki kitnā hasīñ muqaddar hai

mire liye hī khile haiñ masarratoñ ke kañval

ye e'timād mujhe de ga.ī ho tum aa kar

sanam-kadoñ meñ to phailī hai tīrgī har-sū

har ek samt se uThtī haiñ sogvār āñkheñ

ki jab bhī hausla-e-dil ko āzmāyā hai

kisī ko ahd-e-vafā phir na raas aaya hai

magar jo zaḳhm-e-jigar kī pukār guuñj uThe

magar jo tishna-labī kā koī mudāvā ho

shikast-e-gham ka tasawwur ajib hai lekin

teri nigah pe kitna mujhe bharosa hai

mere junun ko nae aastan ki hajat thi

teri talash thi ai jaan-e-husn-o-barnai

tujhi ko pa ke mohabbat ne sar uThaya hai

jabin-e-naz pe ab itni muskurahaT hai

ki Dub jaenge is raushni mein wahm-o-guman

main sochta hun ki kitna hasin muqaddar hai

mere liye hi khile hain masarraton ke kanwal

ye e'timad mujhe de gai ho tum aa kar

sanam-kadon mein to phaili hai tirgi har-su

har ek samt se uThti hain sogwar aankhen

ki jab bhi hausla-e-dil ko aazmaya hai

kisi ko ahd-e-wafa phir na ras aaya hai

magar jo zaKHm-e-jigar ki pukar gunj uThe

magar jo tishna-labi ka koi mudawa ho