ai dil-e-betab Thahar

tīrgī hai ki uñmaDtī hī chalī aatī hai

shab kī rag rag se lahū phuuT rahā ho jaise

chal rahī hai kuchh is andāz se nabz-e-hastī

donoñ aalam kā nasha TuuT rahā ho jaise

raat kā garm lahū aur bhī bah jaane do

yahī tārīkī to hai ġhāza-e-ruḳhsār-e-sahar

sub.h hone hī ko hai ai dil-e-betāb Thahar

abhī zanjīr chhanaktī hai pas-e-parda-e-sāz

mutlaq-ul-hukm hai shīrāza-e-asbāb abhī

sāġhar-e-nāb meñ aañsū bhī Dhalak jaate haiñ

laġhzish-e-pā meñ hai pābandIi-e-ādāb abhī

apne dīvānoñ ko dīvāna to ban lene do

apne mai-ḳhānoñ ko mai-ḳhāna to ban lene do

jald ye satvat-e-asbāb bhī uTh jā.egī

ye girāñ-bārī-e-ādāb bhī uTh jā.egī

ḳhvāh zanjīr chhanaktī hī chhanaktī hī rahe

tirgi hai ki unmaDti hi chali aati hai

shab ki rag rag se lahu phuT raha ho jaise

chal rahi hai kuchh is andaz se nabz-e-hasti

donon aalam ka nasha TuT raha ho jaise

raat ka garm lahu aur bhi bah jaane do

yahi tariki to hai ghaza-e-ruKHsar-e-sahar

subh hone hi ko hai ai dil-e-betab Thahar

abhi zanjir chhanakti hai pas-e-parda-e-saz

mutlaq-ul-hukm hai shiraaza-e-asbab abhi

saghar-e-nab mein aansu bhi Dhalak jate hain

laghzish-e-pa mein hai pabandIi-e-adab abhi

apne diwanon ko diwana to ban lene do

apne mai-KHanon ko mai-KHana to ban lene do

jald ye satwat-e-asbab bhi uTh jaegi

ye giran-bari-e-adab bhi uTh jaegi

KHwah zanjir chhanakti hi chhanakti hi rahe