ai fairy-tail

kabhī bachpan meñ jo paḌhte the pariyoñ kī kahānī meñ

parī koī tilsmātī asar se

nīm-shab saare khilaunoñ ko

badal detī thī jītī-jāgtī maḳhlūq meñ

ab yuuñ huā

aise hī nādīda asar ne

ek ghar meñ

kuchh khilaunoñ ko atā kī zindagī

aur lamha bhar meñ in ko hañsne bolne

aur sub.h kī pahlī kiran tak

zinda rahne par kyā qādir

unhī meñ ek thā aisā khilaunā

jo khilaunoñ se bhare kamre meñ tanhā thā

use bachche kabhī āġhosh meñ lete

kabhī Thokar lagāte the

use sofe ke pīchhe pheñkte aur bhuul jaate the

ye un kā khel thā aur us kī qismat

aaj vo mazlūm bhī pal-bhar meñ zinda ho gayā thā

vo khilaunā

ab koī dard-āshnā be-laus sāthī chāhtā thā

us ne apne paas hī rakhī huī

guḌiyā kī jānib

dostī kā haath phailāyā

magar guḌiyā laraz kar haT ga.ī pīchhe

ki jaise koī dast-e-tifl-e-nādāñ

is kī jānib baḌh rahā ho

jo use iizā bhī degā

aur shāyad toḌ bhī degā

use be-mehr bachchoñ se

jo dukh milte rahe the

un kī talḳhī ne

use achchhe bure ke farq se

aur sachche jazboñ kī pazīrā.ī se begāna kiyā thā

vo shāyad rishta-e-ehsās kī us mehrbāñ tāsīr se nā-āshnā bhī thī

jo āñkhoñ meñ chamak aur zindagī meñ rañg bhartī hai

shikasta-dil khilaunā haath vāpas khīñch kar

ab sub.h kī pahlī kiran kā muntazir hai

jab fusūñ TuuTe aur is se zindagī chhin jaa.e

vo phir ek be-ehsās aur be-jān shai ban jaa.e

kabhi bachpan mein jo paDhte the pariyon ki kahani mein

pari koi tilsmati asar se

nim-shab sare khilaunon ko

badal deti thi jiti-jagti maKHluq mein

ab yun hua

aise hi nadida asar ne

ek ghar mein

kuchh khilaunon ko ata ki zindagi

aur lamha bhar mein in ko hansne bolne

aur subh ki pahli kiran tak

zinda rahne par kya qadir

unhi mein ek tha aisa khilauna

jo khilaunon se bhare kamre mein tanha tha

use bachche kabhi aaghosh mein lete

kabhi Thokar lagate the

use sofe ke pichhe phenkte aur bhul jate the

ye un ka khel tha aur us ki qismat

aaj wo mazlum bhi pal-bhar mein zinda ho gaya tha

wo khilauna

ab koi dard-ashna be-laus sathi chahta tha

us ne apne pas hi rakhi hui

guDiya ki jaanib

dosti ka hath phailaya

magar guDiya laraz kar haT gai pichhe

ki jaise koi dast-e-tifl-e-nadan

is ki jaanib baDh raha ho

jo use iza bhi dega

aur shayad toD bhi dega

use be-mehr bachchon se

jo dukh milte rahe the

un ki talKHi ne

use achchhe bure ke farq se

aur sachche jazbon ki pazirai se begana kiya tha

wo shayad rishta-e-ehsas ki us mehrban tasir se na-ashna bhi thi

jo aankhon mein chamak aur zindagi mein rang bharti hai

shikasta-dil khilauna hath wapas khinch kar

ab subh ki pahli kiran ka muntazir hai

jab fusun TuTe aur is se zindagi chhin jae

wo phir ek be-ehsas aur be-jaan shai ban jae