ai gham-e-dil kya karun

jis pe bhī Dālūñ nazar vo shaḳhs ghabrāyā lage

jis ko dekhūñ zindagī se jaise tang aaya lage

ġham kā maarā har koī ḳhushiyoñ kā Thukrāyā lage

ai ġham-e-dil kyā karūñ ai vahshat-e-dil kyā karūñ

fāqa-mastī tang-dastī kā hai charchā chār-sū

mar ga.ī hai ab diloñ se zindagī kī aarzū

ho gayā hai ḳhushk insānoñ ke jismoñ kā lahū

ai ġham-e-dil kyā karūñ ai vahshat-e-dil kyā karūñ

bachche galiyoñ meñ phireñ āvāra kuttoñ kī tarah

aur saḌkoñ par bikeñ kuchh jism phūloñ kī tarah

koī taḌpe bhuuk se zaḳhmī parindoñ kī tarah

ai ġham-e-dil kyā karūñ ai vahshat-e-dil kyā karūñ

zulm karte haiñ sabhī ab mehrbānī kī jagah

zillateñ miltī haiñ aksar qadrdānī kī jagah

āsmāñ bhī aag barsātā hai paanī kī jagah

ai ġham-e-dil kyā karūñ ai vahshat-e-dil kyā karūñ

rishvatoñ kī Thokaroñ meñ haiñ usūloñ ke mazār

ab nahīñ qānūn meñ talvār kī sī tez dhaar

kho diyā hai aaj ke insān ne apnā vaqār

ai ġham-e-dil kyā karūñ ai vahshat-e-dil kyā karūñ

is na.ī tahzīb ne paidā kiye ujle samāj

kis anokhe Dhang se badlā hai duniyā kā rivāj

husn be-parda huā hai ishq āvāra-mizāj

ai ġham-e-dil kyā karūñ ai vahshat-e-dil kyā karūñ

aadmī ḳhud hī parastār-e-jahālat ban gayā

mandir-o-masjid kā jhagḌā ek aadat ban gayā

dharm to ik pyaar thā jo aaj nafrat ban gayā

ai ġham-e-dil kyā karūñ ai vahshat-e-dil kyā karūñ

hind ho yā paak ho yā ruus ho yā bahr-e-rūm

jis taraf uThtī haiñ nazreñ haiñ vahāñ fitnoñ kī dhuum

aadmī ke fe.al se sahme haiñ ab māh-o-nujūm

ai ġham-e-dil kyā karūñ ai vahshat-e-dil kyā karūñ

zindagī kyā hai taḌaptī dopahar kā ruup hai

har taraf phailī huī be-mā.egī kī dhuup hai

aadmī ke ruup par chhāyā huā bahrūp hai

ai ġham-e-dil kyā karūñ ai vahshat-e-dil kyā karūñ

jis pe bhi Dalun nazar wo shaKHs ghabraya lage

jis ko dekhun zindagi se jaise tang aaya lage

gham ka mara har koi KHushiyon ka Thukraya lage

ai gham-e-dil kya karun ai wahshat-e-dil kya karun

faqa-masti tang-dasti ka hai charcha chaar-su

mar gai hai ab dilon se zindagi ki aarzu

ho gaya hai KHushk insanon ke jismon ka lahu

ai gham-e-dil kya karun ai wahshat-e-dil kya karun

bachche galiyon mein phiren aawara kutton ki tarah

aur saDkon par biken kuchh jism phulon ki tarah

koi taDpe bhuk se zaKHmi parindon ki tarah

ai gham-e-dil kya karun ai wahshat-e-dil kya karun

zulm karte hain sabhi ab mehrbani ki jagah

zillaten milti hain aksar qadrdani ki jagah

aasman bhi aag barsata hai pani ki jagah

ai gham-e-dil kya karun ai wahshat-e-dil kya karun

rishwaton ki Thokaron mein hain usulon ke mazar

ab nahin qanun mein talwar ki si tez dhaar

kho diya hai aaj ke insan ne apna waqar

ai gham-e-dil kya karun ai wahshat-e-dil kya karun

is nai tahzib ne paida kiye ujle samaj

kis anokhe Dhang se badla hai duniya ka riwaj

husn be-parda hua hai ishq aawara-mizaj

ai gham-e-dil kya karun ai wahshat-e-dil kya karun

aadmi KHud hi parastar-e-jahaalat ban gaya

mandir-o-masjid ka jhagDa ek aadat ban gaya

dharm to ek pyar tha jo aaj nafrat ban gaya

ai gham-e-dil kya karun ai wahshat-e-dil kya karun

hind ho ya pak ho ya rus ho ya bahr-e-rum

jis taraf uThti hain nazren hain wahan fitnon ki dhum

aadmi ke feal se sahme hain ab mah-o-nujum

ai gham-e-dil kya karun ai wahshat-e-dil kya karun

zindagi kya hai taDapti dopahar ka rup hai

har taraf phaili hui be-maegi ki dhup hai

aadmi ke rup par chhaya hua bahrup hai

ai gham-e-dil kya karun ai wahshat-e-dil kya karun