ai ju-e-ab

tamām umr ke suud o ziyāñ kā baar liye?

har inqalāb zamāne se muñh chhupā.e hue

hayāt o marg kī sarhad pe nīm-ḳhvābīda

maiñ muntazir thā

masarrat kī koī dhundlī kiran

zamāñ makāñ se pare ajnabī jazīroñ se

dam-e-sahar mujhe ḳhvāboñ meñ DhūñDtī aa.e

fishār-e-vaqt kī sarhad se duur le jaa.e

khulī jo aañkh

tulū-e-sahar ne hañs ke kahā

hisār-e-vaqt se aage koī maqām nahīñ

samajh sako, to zamān o makāñ kī qaid nahīñ

samajh sako

to yahī zaat be-karāñ bhī hai

tamam umr ke sud o ziyan ka bar liye?

har inqalab zamane se munh chhupae hue

hayat o marg ki sarhad pe nim-KHwabida

main muntazir tha

masarrat ki koi dhundli kiran

zaman makan se pare ajnabi jaziron se

dam-e-sahar mujhe KHwabon mein DhunDti aae

fishaar-e-waqt ki sarhad se dur le jae

khuli jo aankh

tulu-e-sahar ne hans ke kaha

hisar-e-waqt se aage koi maqam nahin

samajh sako, to zaman o makan ki qaid nahin

samajh sako

to yahi zat be-karan bhi hai