ai mere pyare watan

tere gulshan kī har ik rangīn Daalī ko salām

terī ḳhushbū terī kaliyoñ tere maalī ko salām

shab kī zulf-e-ambarīñ ko din kī laalī ko salām

ai mire mohsin tire husn-misālī ko salām

reshmīñ kirnoñ meñ lipTī terī sub.hoñ ko salām

nuur meñ Duubī huī pūnam kī rātoñ ko salām

ruup ke sehre sajātī terī kirnoñ ko salām

ai mire mohsin tirī nūrānī sham.oñ ko salām

tere phūloñ ko tirī dilkash bahāroñ ko salām

tere sūraj kī suhānī rahguzāroñ ko salām

tere zarroñ terī dhartī ke sitāroñ ko salām

abr-pāroñ ko phuvāroñ ko chanāroñ ko salām

nuur se chehra ho raushan zulf lahrātī rahe

yuuñ hī terī sub.h terī shaam muskātī rahe

vaqt kī lai par tarāna zindagī kā chheḌ kar

terī azmat ko na.ī tārīḳh dohrātī rahe

ai vatan pyāre vatan mere vatan mere vatan

tere gulshan ki har ek rangin Dali ko salam

teri KHushbu teri kaliyon tere mali ko salam

shab ki zulf-e-ambarin ko din ki lali ko salam

ai mere mohsin tere husn-misali ko salam

reshmin kirnon mein lipTi teri subhon ko salam

nur mein Dubi hui punam ki raaton ko salam

rup ke sehre sajati teri kirnon ko salam

ai mere mohsin teri nurani shamon ko salam

tere phulon ko teri dilkash bahaaron ko salam

tere suraj ki suhani rahguzaron ko salam

tere zarron teri dharti ke sitaron ko salam

abr-paron ko phuwaron ko chanaron ko salam

nur se chehra ho raushan zulf lahraati rahe

yun hi teri subh teri sham muskati rahe

waqt ki lai par tarana zindagi ka chheD kar

teri azmat ko nai tariKH dohraati rahe

ai watan pyare watan mere watan mere watan