ai mere KHwab

ai mire ḳhvāb

hunar-ḳhez rivāyat ke amiiñ

inkishāfāt kī daryūza-garī chhoḌ bhī de

gard-e-hañgām meñ tartīb se rakh

aañkh kī ḳhasta fasīloñ se gire ḳhisht-mizāj

un chune zard guloñ se Dhake kuchh soḳhta pal

samt kā koī ta.ayyun to nazar meñ Thahre

ai mire ḳhvāb

mire saath na chal

mujhe darpesh hai lā-samt samāj

ek vīrānī tamāshe meñ guñdhī

ye tamāshā nahīñ pāband-e-charāġh

gard ne raḳht-e-safar aañkh kā chhal

ghar kahāñ hai koī ghar meñ Thahre

ai mire ḳhvāb

mināroñ pe parinde utre

jaane kis ḳhauf se jañgal se palaT aa.e haiñ

Dar hai ye surḳh aqīqoñ ko nigal jā.eñge

sansanātī huī tanhā.ī meñ ghir jā.eñge

un ko darpesh hai ab hijr kā thal

is ḳharābe meñ bhalā kaun safar meñ Thahre

ai mere KHwab

hunar-KHez riwayat ke amin

inkishafat ki daryuza-gari chhoD bhi de

gard-e-hangam mein tartib se rakh

aankh ki KHasta fasilon se gire KHisht-mizaj

un chune zard gulon se Dhake kuchh soKHta pal

samt ka koi tayyun to nazar mein Thahre

ai mere KHwab

mere sath na chal

mujhe darpesh hai la-samt samaj

ek virani tamashe mein gundhi

ye tamasha nahin paband-e-charagh

gard ne raKHt-e-safar aankh ka chhal

ghar kahan hai koi ghar mein Thahre

ai mere KHwab

minaron pe parinde utre

jaane kis KHauf se jangal se palaT aae hain

Dar hai ye surKH aqiqon ko nigal jaenge

sansanati hui tanhai mein ghir jaenge

un ko darpesh hai ab hijr ka thal

is KHarabe mein bhala kaun safar mein Thahre