aisa bhi nahin ki

aisā bhī nahīñ ki mujhe zindagī ke peḌ ke paas

be-ās aur be-sahārā chhoḌ diyā gayā ho

maiñ ne abhī abhī gilahriyoñ kī āvāz sunī hai

gilahriyāñ mere liye

bahisht ke aḳhroT lā rahī haiñ

sivā.e is ke ki ādam-zād kahīñ dikhā.ī nahīñ detā

magar jañgal bol rahā hai ki is ke bol meñ

merī bichhḌī huī āvāz shāmil hai

mere bāl-bachchoñ kā pyaar shāmil hai

sivā.e is ke ki jin logoñ ne mujhe be-nām

jazīroñ meñ le jaane kā va.ada kiyā thā

vo ab kahīñ dikhā.ī nahīñ diye

to ab maiñ kis se kahūñ

ki kahne sunñe vaalā zindagī kā nizām to baaqī nahīñ rahā

avaa.e us ke ki miTTī kah rahī hai

ki vo an-ginat peḌ paude tab ugā.egī

jab maiñ yahāñ hūñgā hī nahīñ

aisa bhi nahin ki mujhe zindagi ke peD ke pas

be-as aur be-sahaara chhoD diya gaya ho

main ne abhi abhi gilahriyon ki aawaz suni hai

gilahriyan mere liye

bahisht ke aKHroT la rahi hain

siwae is ke ki aadam-zad kahin dikhai nahin deta

magar jangal bol raha hai ki is ke bol mein

meri bichhDi hui aawaz shamil hai

mere baal-bachchon ka pyar shamil hai

siwae is ke ki jin logon ne mujhe be-nam

jaziron mein le jaane ka wada kiya tha

wo ab kahin dikhai nahin diye

to ab main kis se kahun

ki kahne sunne wala zindagi ka nizam to baqi nahin raha

awae us ke ki miTTi kah rahi hai

ki wo an-ginat peD paude tab ugaegi

jab main yahan hunga hi nahin