ajab bala-KHez marhala tha

ajab safar thā

ajab pur-asrār marhala thā

ajiib hañgām-e-rah-e-navardī

ajiib shauq-e-jahāñ-numā thā

na koī saut-e-darā sadā-e-rahīl thī

aur na koī manzil na kārvāñ thā

ajiib ḳhū-e-safar thī

jo zād-e-rāh thī

ham-safar thī

rahrav thī

rāhbar thī

na dil meñ andesha-e-marāhil

na ḳhauf-e-jāda

na intizār-e-savād-e-manzil

har us tūfān-e-bād-o-bārāñ

na paa.e rah-e-āfrīñ meñ laġhzish

na rāh-e-gum-kardagī kā sadma

bas ek bebāk hausla thā

jo saarī hastī pe chhā gayā thā

ki jaan mahshar-ba-dast thī

pech-o-ḳham rah-e-pur-ḳhatar ke uqda-kushā the

dil fāriġh-e-ḳhatar thā

ajab safar thā

ajab balā-ḳhez marhala thā

ki duur tak

sarhad-e-ufuq tak

samundar-o-sabza-zār-o-wādī-o-koh-o-sahrā-o-dasht-o-dariyā the

aur maiñ thī

musāfirat thī

safar barā.e-safar thā

ik pyaas kā samundar thā

jo rag-e-jāñ meñ maujzan thā

vo arsa-e-motabar thā

yā ahd-e-muḳhtasar thā

vo jo bhī thā

ik ajab safar thā

ajab balā-ḳhez marhala thā

ajab safar tha

ajab pur-asrar marhala tha

ajib hangam-e-rah-e-nawardi

ajib shauq-e-jahan-numa tha

na koi saut-e-dara sada-e-rahil thi

aur na koi manzil na karwan tha

ajib KHu-e-safar thi

jo zad-e-rah thi

ham-safar thi

rahraw thi

rahbar thi

na dil mein andesha-e-marahil

na KHauf-e-jada

na intizar-e-sawad-e-manzil

har us tufan-e-baad-o-baran

na pae rah-e-afrin mein laghzish

na rah-e-gum-kardagi ka sadma

bas ek bebak hausla tha

jo sari hasti pe chha gaya tha

ki jaan mahshar-ba-dast thi

pech-o-KHam rah-e-pur-KHatar ke uqda-kusha the

dil farigh-e-KHatar tha

ajab safar tha

ajab bala-KHez marhala tha

ki dur tak

sarhad-e-ufuq tak

samundar-o-sabza-zar-o-wadi-o-koh-o-sahra-o-dasht-o-dariya the

aur main thi

musafirat thi

safar barae-safar tha

ek pyas ka samundar tha

jo rag-e-jaan mein maujzan tha

wo arsa-e-motabar tha

ya ahd-e-muKHtasar tha

wo jo bhi tha

ek ajab safar tha

ajab bala-KHez marhala tha