ajib log hain

ajiib log the

sūraj kī raushnī ke tale

ḳhud apne-āp ko pahchān bhī rahe the

aur

laboñ pe da.avā-e-inkār-e-āftāb bhī thā

vo jānte the ki sūraj kī raushnī ke sivā

koī charāġh mayassar nahīñ hai aisā jo

talāsh-e-asl-e-haqīqat ke ziine chaḌhte hue

be-imtiyāzī meñ is āftāb jaisā ho

ajiib log the

sūraj ke nūr-ḳhāne meñ

kirā.e-dār bhī the aur sar-nigūñ nahīñ the

kisī sharār-e-munāfiq ne un ke sīnoñ meñ

zabāñ-darāzī kī us aag ko havā dī thī

jise qabīla-e-ġhaflat ke ḳhushk logoñ ne

anā ke ḳhabt pe aflāk se nikāle hue

kisī darinda-e-be-shakl kī tasallī par

barā.e-nashsha-e-haivāniyat uThā liyā thā

magar ye kyā

ki phir aaj is hamārī bastī meñ

ajiib log haiñ

sūraj kī raushnī ke tale

ḳhud apne-āp ko pahchān bhī rahe haiñ

aur

laboñ pe da.avā-e-inkār-e-āftāb bhī hai

ajiib log haiñ

sūraj ke nūr-ḳhāne meñ

kirā.e-dār bhī haiñ

aur sar-nigūñ nahīñ haiñ

ajib log the

suraj ki raushni ke tale

KHud apne-ap ko pahchan bhi rahe the

aur

labon pe dawa-e-inkar-e-aftab bhi tha

wo jaante the ki suraj ki raushni ke siwa

koi charagh mayassar nahin hai aisa jo

talash-e-asl-e-haqiqat ke zine chaDhte hue

be-imtiyazi mein is aaftab jaisa ho

ajib log the

suraj ke nur-KHane mein

kirae-dar bhi the aur sar-nigun nahin the

kisi sharar-e-munafiq ne un ke sinon mein

zaban-daraazi ki us aag ko hawa di thi

jise qabila-e-ghaflat ke KHushk logon ne

ana ke KHabt pe aflak se nikale hue

kisi darinda-e-be-shakl ki tasalli par

barae-nashsha-e-haiwaniyat uTha liya tha

magar ye kya

ki phir aaj is hamari basti mein

ajib log hain

suraj ki raushni ke tale

KHud apne-ap ko pahchan bhi rahe hain

aur

labon pe dawa-e-inkar-e-aftab bhi hai

ajib log hain

suraj ke nur-KHane mein

kirae-dar bhi hain

aur sar-nigun nahin hain