ajib ma-fauq silsila tha

ajiib mā-fauq silsila thā

shajar jaḌoñ ke baġhair hī

ug rahe the

ḳheme baġhair choboñ ke

aur tanāboñ ke āsare ke

zamīñ pe istāda ho rahe the

charāġh lau ke baġhair hī

jal rahe the

kuuze baġhair miTTī ke

chaak par Dhal rahe the

dariyā baġhair paanī ke

bah rahe the

sabhī duā.eñ girafta-pā thiiñ

rukī huī chīzeñ qāfila thiiñ

pahāḌ bārish ke ek qatre se

ghul rahe the

baġhair chābī ke qufl

az-ḳhud hī khul rahe the

niDar piyāda the

aur buzdil

asiil ghoḌoñ pe baiTh kar

jañg laḌ rahe the

gunāhgāroñ ne sar se pā tak

badan ko burrāq chādaroñ se

Dhakā huā thā

valī kī nañgī kamar chhupāne ko

koī kapḌā nahīñ bachā thā

ajiib mā-fauq silsila thā

ajib ma-fauq silsila tha

shajar jaDon ke baghair hi

ug rahe the

KHeme baghair chobon ke

aur tanabon ke aasare ke

zamin pe istada ho rahe the

charagh lau ke baghair hi

jal rahe the

kuze baghair miTTi ke

chaak par Dhal rahe the

dariya baghair pani ke

bah rahe the

sabhi duaen girafta-pa thin

ruki hui chizen qafila thin

pahaD barish ke ek qatre se

ghul rahe the

baghair chabi ke qufl

az-KHud hi khul rahe the

niDar piyaada the

aur buzdil

asil ghoDon pe baiTh kar

jang laD rahe the

gunahgaron ne sar se pa tak

badan ko burraq chadaron se

Dhaka hua tha

wali ki nangi kamar chhupane ko

koi kapDa nahin bacha tha

ajib ma-fauq silsila tha