ajnabi moD par

hai kahāñ vo samāñ

dard ke nuur meñ dhul ke nikhre hue jism-o-jāñ

be-hisī kī chaTāneñ girātī huī

raah sañg-e-ḳhār haTātī huī

karb-e-taḳhlīq kī naddiyāñ

ruuh ke zaḳhm dhotī huī

tund jazbāt kī badliyāñ

ābshār-e-ravāñ

vo matā-e-girāñ

roz-o-shab kī faromāya gardān meñ kho ga.ī

lazzat-e-vasl kī bekalī

hijr-e-betāb kī raushnī

manzil-e-be-nishāñ kī kasak

an-sune giit kī naġhmagī

dasht-e-ayyām ke jaane kis moḌ par

ajnabī rahguzāroñ meñ gum ho ga.ī

dil gayā dil kī vo be-qarārī ga.ī

qalb-e-majrūh kī sogvārī ga.ī

nāla-e-shab gayā be-sabab ashk-bārī ga.ī

jāgne ke jo āsār the so ga.e

sub.h-o-shām ajnabī ho ga.e

ai ḳhudā

ai ḳhudā

azhdahām-e-tijārat meñ tū hī batā

ḳhvāb āñkhoñ meñ kaise basā.eñge ham

kaun sī raah par

garm ashkoñ ke motī bichhā.eñge ham

aah kis aarzū ke liye

sar-e-mizhgāñ charāġh-e-basīrat jalā.eñge ham

ishq meñ kis tasavvur ke

ab jaañ se jā.eñge ham

hai kahan wo saman

dard ke nur mein dhul ke nikhre hue jism-o-jaan

be-hisi ki chaTanen giraati hui

rah sang-e-KHar haTati hui

karb-e-taKHliq ki naddiyan

ruh ke zaKHm dhoti hui

tund jazbaat ki badliyan

aabshaar-e-rawan

wo mata-e-giran

roz-o-shab ki faromaya gardan mein kho gai

lazzat-e-wasl ki bekali

hijr-e-betab ki raushni

manzil-e-be-nishan ki kasak

an-sune git ki naghmagi

dasht-e-ayyam ke jaane kis moD par

ajnabi rahguzaron mein gum ho gai

dil gaya dil ki wo be-qarari gai

qalb-e-majruh ki sogwari gai

nala-e-shab gaya be-sabab ashk-bari gai

jagne ke jo aasar the so gae

subh-o-sham ajnabi ho gae

ai KHuda

ai KHuda

azhdaham-e-tijarat mein tu hi bata

KHwab aankhon mein kaise basaenge hum

kaun si rah par

garm ashkon ke moti bichhaenge hum

aah kis aarzu ke liye

sar-e-mizhgan charagh-e-basirat jalaenge hum

ishq mein kis tasawwur ke

ab jaan se jaenge hum