akaD shah kahilon ka sardar

kiyā kaam jo bhī to khaa.ī shikast

bil-āḳhir huī us kī himmat hī past

akaḌ shaah bantā gayā postī

mohalle ke sustoñ se kī dostī

sabhī sust mil-jul ke rahne lage

mashaqqat vo aapas meñ sahne lage

unhī kāhiloñ meñ thā ik māl-dār

jo sustī kā thā nisbatan kam shikār

kahā us ne sab kāhiloñ se suno

tum apne liye ek afsar chuno

hai us ke liye kaun tayyār ab

jise ham kaheñ apnā sardār ab

uThāyā har ik sust ne sun ke haath

akaḌ shaah shāmil thā un sab ke saath

magar haath us ne uThāyā nahīñ

zabāñ se bhī us ne batāyā nahīñ

akaḌ shaah se pūchhā phir ek ne

ki haath aap ke kyoñ nahīñ haiñ uThe

akaḌ shaah bolā ai mere aziiz

imārat nahīñ chhoḌ dene kī chiiz

magar merā sustī ne chhoḌā na saath

faqat kāhilī se uThāyā na haath

sabhī us kī sustī ke qaa.il hue

usī kī imārat pe maa.il hue

akaḌ shaah ko dī ga.ī ek car

akaḌ kar huā us meñ ik din savār

rakhī us ne pahle to raftār kam

magar tez kī us ne phir ek dam

jo baiThe the sāthī vo hairāñ hue

ki tezī se us kī pareshāñ hue

phir ik sust ne kar ke himmat kahā

achānak ye tezī hai kyā mājrā

akaḌ shaah ne rah ke chup thoḌī der

kahā acceletor pe rakhā thā pair

magar phir jo sustī rukāvaT banī

to raftār gaaḌī kī baḌhtī rahī

'usāma' se qisse akaḌ shaah ke

na jāoge sun kar binā vaah ke

kiya kaam jo bhi to khai shikast

bil-aKHir hui us ki himmat hi past

akaD shah banta gaya posti

mohalle ke suston se ki dosti

sabhi sust mil-jul ke rahne lage

mashaqqat wo aapas mein sahne lage

unhi kahilon mein tha ek mal-dar

jo susti ka tha nisbatan kam shikar

kaha us ne sab kahilon se suno

tum apne liye ek afsar chuno

hai us ke liye kaun tayyar ab

jise hum kahen apna sardar ab

uThaya har ek sust ne sun ke hath

akaD shah shamil tha un sab ke sath

magar hath us ne uThaya nahin

zaban se bhi us ne bataya nahin

akaD shah se puchha phir ek ne

ki hath aap ke kyon nahin hain uThe

akaD shah bola ai mere aziz

imarat nahin chhoD dene ki chiz

magar mera susti ne chhoDa na sath

faqat kahili se uThaya na hath

sabhi us ki susti ke qail hue

usi ki imarat pe mail hue

akaD shah ko di gai ek car

akaD kar hua us mein ek din sawar

rakhi us ne pahle to raftar kam

magar tez ki us ne phir ek dam

jo baiThe the sathi wo hairan hue

ki tezi se us ki pareshan hue

phir ek sust ne kar ke himmat kaha

achanak ye tezi hai kya majra

akaD shah ne rah ke chup thoDi der

kaha acceletor pe rakha tha pair

magar phir jo susti rukawaT bani

to raftar gaDi ki baDhti rahi

'usama' se qisse akaD shah ke

na jaoge sun kar bina wah ke