aKHbar-nawiso

aḳhbār-navīso

sirf chaar chehre 'aurat ke

aḳhbār ke pahle safhe par

'aurat kī numā.indagī nahīñ karte

qalam tumhārā ahāta-e-tahrīr meñ lā saktā nahīñ un chehroñ ko

na camera hī koī tasvīr khīñch saktā hai un chehroñ kī

jo kisī tarke meñ haiñ chhupe hue aur matrūk haiñ

jo zar aur zamīn kā zāviya haiñ tīsrā

samāj ke ‘alam-bardāro

kachche chehre kī vinnī bhī hai kahīñ

kaarī kā adh jalā gulāb bhī

ġham kī haveliyāñ bhī haiñ farsh-e-zāt meñ uljhī huiiñ

rāhdāriyoñ meñ haiñ ghūmte

tiin harf iqrār ke

sūraj bhī haiñ chhupe hue hatheliyoñ kī oT meñ

raushnī jin ke gumān kī siyāh zulmatoñ meñ kho chukī

qindīl-e-zindagī kī aas meñ

mire dānishvaro

tahaffuz-e-huqūq-e-nisvāñ kā seminar ho

yā dastār vāloñ ke bayān

chaar chehre 'aurat ke hoñ

yā ek tārīḳh calendar kī

bhalā kaise

sadiyoñ kī chup ke bhed khol pā.eñge

aKHbar-nawiso

sirf chaar chehre 'aurat ke

aKHbar ke pahle safhe par

'aurat ki numaindagi nahin karte

qalam tumhaara ahata-e-tahrir mein la sakta nahin un chehron ko

na camera hi koi taswir khinch sakta hai un chehron ki

jo kisi tarke mein hain chhupe hue aur matruk hain

jo zar aur zamin ka zawiya hain tisra

samaj ke ‘alam-bardaro

kachche chehre ki winni bhi hai kahin

kari ka adh jala gulab bhi

gham ki haweliyan bhi hain farsh-e-zat mein uljhi huin

rahdariyon mein hain ghumte

tin harf iqrar ke

suraj bhi hain chhupe hue hatheliyon ki oT mein

raushni jin ke guman ki siyah zulmaton mein kho chuki

qindil-e-zindagi ki aas mein

mere danishwaro

tahaffuz-e-huquq-e-niswan ka seminar ho

ya dastar walon ke bayan

chaar chehre 'aurat ke hon

ya ek tariKH calendar ki

bhala kaise

sadiyon ki chup ke bhed khol paenge