al-ayazar mar gaya

bulb kā jabḌā khule aag baras jaa.e to

gar ye istaḳhar abhī ḳhuun se bhar jaa.e to

yā ye istaḳhar

jahāñ aab ke manshūroñ se

rang-e-hastī se fanā kī ye dhanak ubhrī hai

koī istaḳhar na ho kokh ho merī maañ kī

aur maiñ maiñ nahīñ shāyad vo uchhaltā paanī

jis ne sāñsoñ kī tanāboñ ko pakaḌ rakhā thā

vaa.e qismat ki mire haath meñ rassī na rahī

aah merā ye janīñ ḳhuun ugaltā jaa.e

is qadar ḳhuun mirī maañ kā batn bhar jaa.e

is qadar ḳhuun ki surgeon kā labāda mere

surḳh ayyām kī tanhā.ī sā gāḌhā ho jaa.e

aur tāñbe ke kisī garm se bartan meñ abhī

mere lāshe ke kaTe laḳht paḌe hilte hoñ

bulb ka jabDa khule aag baras jae to

gar ye istaKHar abhi KHun se bhar jae to

ya ye istaKHar

jahan aab ke manshuron se

rang-e-hasti se fana ki ye dhanak ubhri hai

koi istaKHar na ho kokh ho meri man ki

aur main main nahin shayad wo uchhalta pani

jis ne sanson ki tanabon ko pakaD rakha tha

wae qismat ki mere hath mein rassi na rahi

aah mera ye janin KHun ugalta jae

is qadar KHun meri man ka batn bhar jae

is qadar KHun ki surgeon ka labaada mere

surKH ayyam ki tanhai sa gaDha ho jae

aur tanbe ke kisi garm se bartan mein abhi

mere lashe ke kaTe laKHt paDe hilte hon