al-butra

kitne samundar

kitne sahrā

jangal aur bārisheñ

be-shumār ā.īnoñ kā ḳhālī-pan

lamhe yā sadiyāñ

ubuur kar ke

dāḳhil huī

merī tanhā.ī

terī tanhā.ī meñ

ai shahar-e-gul-e-surḳh

ai aziim ḳhūbsūrat patthar

mujhe ḳhazāne se

koī sarokār nahīñ

jahāñ khūñTe se bañdhā

laal ghoḌā

te.iis sau baras

kī be-ḳhvābī meñ

īstāda hai

mujhe faqat terī udaas raat kā

ek konā darkār hai

ki merī ḳhāmoshī

terī ḳhāmoshī se kalām kare

mere paas afsos kī kahānī hai

jise sun kar qadīm chāñd

ret ke aañsū bahā.egā

ki tere mātamī gulāb sairāb hoñ

uḌte zamānoñ kī dhajjiyāñ

gum-shuda umroñ kī rā.igānī

tārīḳh kī munāfiq almāriyoñ meñ

laTakte ustuḳhvāñ

mujhe amānat-dār pā.eñge

barbād dīvāroñ kī ḳharāshoñ se

jhāñktā inhimāk nahīñ TūTegā

ai gulāb shahr

maiñ be-zabān qissa-go

ek shab-basarī kā savālī huuñ

tere sangīn darvāze par

maiñ tujhe tere jaisā

apnā dil hadiya karūñgā

patthar kā gulāb

tujhe ḳhāmosh dāstān sunā.ūñgā

kisī bahut qadīm zamāne kī

gunāhgār ḳhudāoñ se duur

ḳhālis ibādat guzār añdhere meñ

sub.h-e-abad ke āḳhirī qahqahe se be-niyāz

kitne samundar

kitne sahra

jangal aur barishen

be-shumar aainon ka KHali-pan

lamhe ya sadiyan

ubur kar ke

daKHil hui

meri tanhai

teri tanhai mein

ai shahar-e-gul-e-surKH

ai azim KHubsurat patthar

mujhe KHazane se

koi sarokar nahin

jahan khunTe se bandha

lal ghoDa

teis sau baras

ki be-KHwabi mein

istada hai

mujhe faqat teri udas raat ka

ek kona darkar hai

ki meri KHamoshi

teri KHamoshi se kalam kare

mere pas afsos ki kahani hai

jise sun kar qadim chand

ret ke aansu bahaega

ki tere matami gulab sairab hon

uDte zamanon ki dhajjiyan

gum-shuda umron ki raigani

tariKH ki munafiq almariyon mein

laTakte ustuKHwan

mujhe amanat-dar paenge

barbaad diwaron ki KHarashon se

jhankta inhimak nahin TuTega

ai gulab shahr

main be-zaban qissa-go

ek shab-basari ka sawali hun

tere sangin darwaze par

main tujhe tere jaisa

apna dil hadiya karunga

patthar ka gulab

tujhe KHamosh dastan sunaunga

kisi bahut qadim zamane ki

gunahgar KHudaon se dur

KHalis ibaadat guzar andhere mein

subh-e-abad ke aaKHiri qahqahe se be-niyaz