album

nār-o-namrūd kā vo qissa to pārīna hai

kyā kahā

misr-o-kan.ān ke ta'alluq kī kahānī chheḌūñ

misr-o-kan.ān meñ kyā rakhā hai

niil kī lahroñ ke hamrāh chale the muusā

karne ġharqāb usī niil meñ kis ko āḳhir

aur shaddād

vo jannat kaisī

kis ke kyā ḳhvāb the kyā makr the kyā hiile the

aao sab dafn kareñ

kohna aurāq meñ kyā rakkhā hai

laao album vo zarā

dekheñ tasvīr na.ī

ḳhushbū-o-rang-o-dhanak bādal kī

haañ vahī qarya jo tahzīb kā gahvāra thā

dekh kar jis kā fusūñ

rāsta vāpsī kā kitne musāfir bhūle

tum ko ma.alūm nahīñ hai shāyad

uf ye tasvīr-e-siyah

ye siyah-rūh jo tārīk guphāoñ meñ rahā kartī thī

panja-e-ḳhūnīñ ne us ke āḳhir

ḳhitta-e-arz-e-muqaddas ko lahū-rez kiyā

kyā amīrān-e-ajam kaise faqīhān-e-haram

sab ke sab us kī hathelī meñ haiñ band

dekh ejāz-bayānī us kī

muñh chhupā.e hue

shahr-e-bābul kā sehr phirtā hai

pattharoñ ko kiyā raushan mash.al

aur shajar Tahnī ko uḌtā taa.ir

is ajab dhund ajab sehr meñ mad.hosh the sab

ki yakāyak girī tasvīr ik aur album se

dekhte kyā haiñ ki us ḳhitte ke ik goshe se

vāris-e-shahr garāñ-ḳhvāb uThe

qulba-rānī ne jinheñ azm-e-musammam baḳhshā

jism meñ Thoñkī huī kīleñ sabhī

noch kar pheñk hī diiñ

hosh aate hī chale qasr-e-muqaddas kī taraf

aur siyah-rūh vo tārīk guphā

jis ne is qasr-e-muqaddas ko kiyā thā masmūm

nātiqa sar-ba-garebāñ us kā

sāhirī shola-bayānī-o-adākārī sabhī gung

nar-o-namrud ka wo qissa to parina hai

kya kaha

misr-o-kanan ke ta'alluq ki kahani chheDun

misr-o-kanan mein kya rakha hai

nil ki lahron ke hamrah chale the musa

karne gharqab usi nil mein kis ko aaKHir

aur shaddad

wo jannat kaisi

kis ke kya KHwab the kya makr the kya hile the

aao sab dafn karen

kohna auraq mein kya rakkha hai

lao album wo zara

dekhen taswir nai

KHushbu-o-rang-o-dhanak baadal ki

han wahi qarya jo tahzib ka gahwara tha

dekh kar jis ka fusun

rasta wapsi ka kitne musafir bhule

tum ko malum nahin hai shayad

uf ye taswir-e-siyah

ye siyah-ruh jo tarik guphaon mein raha karti thi

panja-e-KHunin ne us ke aaKHir

KHitta-e-arz-e-muqaddas ko lahu-rez kiya

kya amiran-e-ajam kaise faqihan-e-haram

sab ke sab us ki hatheli mein hain band

dekh ejaz-bayani us ki

munh chhupae hue

shahr-e-babul ka sehr phirta hai

pattharon ko kiya raushan mashal

aur shajar Tahni ko uDta tair

is ajab dhund ajab sehr mein madhosh the sab

ki yakayak giri taswir ek aur album se

dekhte kya hain ki us KHitte ke ek goshe se

waris-e-shahr garan-KHwab uThe

qulba-rani ne jinhen azm-e-musammam baKHsha

jism mein Thonki hui kilen sabhi

noch kar phenk hi din

hosh aate hi chale qasr-e-muqaddas ki taraf

aur siyah-ruh wo tarik gupha

jis ne is qasr-e-muqaddas ko kiya tha masmum

natiqa sar-ba-gareban us ka

sahiri shola-bayani-o-adakari sabhi gung