alif laila

thak ga.ī raat masakne lagā ġhāza kā fusūñ

sard paḌne lagīñ gardan meñ hamā.il bāñheñ

farsh bistar pe bikharne lage afshāñ ke charāġh

muzmahil sī nazar aane lagīñ ishrat-gāheñ

zindagī kitne hī vīrānoñ meñ dam toḌ chukī

ab bhī miltī haiñ magar ġham kī fasurda rāheñ

jis tarah taaq meñ jal bujhtī haiñ sham.oñ kī qatār

zulmat-e-shab meñ jagātī huī kāshānoñ ko

ban ke rah jaatī hai tā-sub.h patañgoñ kā mazār

ḳhuun ke harfoñ meñ tahrīr hai dīvāroñ par

in ghisaTte hue ajsām ke ambāroñ meñ

dard ke ruḳh ko palaT dene kā maqdūr nahīñ

fikr ghabrā.ī huī phirtī hai bāzāroñ meñ

umr ik sail-e-ufūnat hai badar-rū kī misāl

ziist ik cha-ba-cha saḌtā huā gadlā paanī

jis se sairāb huā karte haiñ ḳhinzīr o shaġhāl

vaqt kī jaltī huī raakh se jhulse hue paañv

kī ghanī chhāñv meñ baiThe hue dil

karb-e-māzī ke girāñ bojh se Duubī nabzeñ

laakh chāheñ pe ubharne kā gumāñ lā-hāsil

ek mauhūm sī hasrat meñ jiye jaate haiñ

naam hī naam masarrat kā liye jaate haiñ

apnī be-ḳhvāb tamannā kā fasāna hai yahī

kal kī shab aur na.ī aur na.ī shab hogī

zindagī hogī na.ī aur kahānī bhī na.ī

sabr ai dost ki zulmat kī ghaḌī biit ga.ī

thak ga.ī raat masalne lagā ġhāza kā fusūñ

sard paḌne lagīñ gardan meñ hamā.il bāñheñ

thak gai raat masakne laga ghaza ka fusun

sard paDne lagin gardan mein hamail banhen

farsh bistar pe bikharne lage afshan ke charagh

muzmahil si nazar aane lagin ishrat-gahen

zindagi kitne hi viranon mein dam toD chuki

ab bhi milti hain magar gham ki fasurda rahen

jis tarah taq mein jal bujhti hain shamon ki qatar

zulmat-e-shab mein jagati hui kashanon ko

ban ke rah jati hai ta-subh patangon ka mazar

KHun ke harfon mein tahrir hai diwaron par

in ghisaTte hue ajsam ke ambaron mein

dard ke ruKH ko palaT dene ka maqdur nahin

fikr ghabrai hui phirti hai bazaron mein

umr ek sail-e-ufunat hai badar-ru ki misal

zist ek cha-ba-cha saDta hua gadla pani

jis se sairab hua karte hain KHinzir o shaghaal

waqt ki jalti hui rakh se jhulse hue panw

ki ghani chhanw mein baiThe hue dil

karb-e-mazi ke giran bojh se Dubi nabzen

lakh chahen pe ubharne ka guman la-hasil

ek mauhum si hasrat mein jiye jate hain

nam hi nam masarrat ka liye jate hain

apni be-KHwab tamanna ka fasana hai yahi

kal ki shab aur nai aur nai shab hogi

zindagi hogi nai aur kahani bhi nai

sabr ai dost ki zulmat ki ghaDi bit gai

thak gai raat masalne laga ghaza ka fusun

sard paDne lagin gardan mein hamail banhen