amn ka paighambar

kaash aise meñ kahīñ duniyā ko aa jaa.e nazar

shā.ir-e-husn-o-mohabbat amn kā paiġhāmbar

shāñtī kā ik nayā sandesh de sansār ko

apne jaadū se dabā de ḳhuun ke mañjdhār ko

bāñsurī kī lai se phir nabzoñ meñ dauḌā de lahū

husn ko de phir tajallī ishq ko phir aarzū

uḌ na jaa.e baaġh ke masle hue phūloñ kā rang

Daal de siine meñ un ke apne naġhmoñ se umang

ho na jaa.e raakh jal kar ye dayār-e-ḳhār-o-ḳhas

Daal de bijlī se le kar us ke siine meñ nafas

kal kā ye jaagā huā phir ho na jaa.e mahv-e-ḳhvāb

le ke tūfānoñ se us ko baḳhsh de ik iztirāb

chaltī phirtī mayyatoñ ko zindagānī baḳhsh de

zindagānī kyā hayāt-e-jāvedānī baḳhsh de

dahr hai bechain us ke giit sunñe ke liye

zulmatoñ meñ nuur kī kirnoñ ko chunñe ke liye

kash aise mein kahin duniya ko aa jae nazar

shair-e-husn-o-mohabbat amn ka paighambar

shanti ka ek naya sandesh de sansar ko

apne jadu se daba de KHun ke manjdhaar ko

bansuri ki lai se phir nabzon mein dauDa de lahu

husn ko de phir tajalli ishq ko phir aarzu

uD na jae bagh ke masle hue phulon ka rang

Dal de sine mein un ke apne naghmon se umang

ho na jae rakh jal kar ye dayar-e-KHar-o-KHas

Dal de bijli se le kar us ke sine mein nafas

kal ka ye jaga hua phir ho na jae mahw-e-KHwab

le ke tufanon se us ko baKHsh de ek iztirab

chalti phirti mayyaton ko zindagani baKHsh de

zindagani kya hayat-e-jawedani baKHsh de

dahr hai bechain us ke git sunne ke liye

zulmaton mein nur ki kirnon ko chunne ke liye