amn ka tehwar

kal jo sapne the adhūre aaj puure hoñge vo

aaj ham jamhūriyat kā giit gā.eñge zarūr

amn kī sham.eñ jalīñ har sū ujālā ho gayā

miT ga.e haiñ zulm kī tārīkiyoñ ke sab ġhurūr

kah do saarī zulmatoñ se talḳhiyoñ se hoñ vo duur

kyoñ ki arzāñ ho ga.ī hai dahr meñ sahbā-e-nūr

aaj phir tārīkiyoñ ke miT hī jā.eñge nishāñ

diip ḳhushiyoñ ke jaleñge bastī-e-ġham-ḳhvār meñ

ḳhud-baḳhud manzil khiñchī aa.egī qadmoñ ke tale

azm-e-nau kī ḳhū bhī shāmil hogī jab atvār meñ

muttahid hai kitnā bhārat dahr ko batlā.eñge

azmat-e-jamhūriyat duniyā ko ham dikhlā.eñge

ek hī dīvār ke saa.e meñ haiñ dair-o-haram

haañ vahī bhārat hai ye jo amn kī tasvīr hai

gautam-o-gāñdhī javāhar-lāl aur āzād ne

dekhā thā jo ḳhvāb pahroñ us kī ye ta.abīr hai

kah do duniyā se hasīñ kirdār bhī ab siikh le

aa.e ham se amn ke atvār bhī ab siikh le

aaj vo din hai ki jis din ke liye the ḳhuuñ bahe

chandr-shekhar aur bhagat-singh aur phir gāñdhī ke ḳhuun

aur haañ jauhar alī muḳhtār-o-sayyad the vahī

thā sadā jin ke diloñ se sar kaTāne kā junūn

desh kī ḳhātir huā jin kā janam aur maut bhī

maut jin kī maut pe rotī rahī rotī rahī

kal jo sapne the adhure aaj pure honge wo

aaj hum jamhuriyat ka git gaenge zarur

amn ki shamen jalin har su ujala ho gaya

miT gae hain zulm ki tarikiyon ke sab ghurur

kah do sari zulmaton se talKHiyon se hon wo dur

kyon ki arzan ho gai hai dahr mein sahba-e-nur

aaj phir tarikiyon ke miT hi jaenge nishan

dip KHushiyon ke jalenge basti-e-gham-KHwar mein

KHud-baKHud manzil khinchi aaegi qadmon ke tale

azm-e-nau ki KHu bhi shamil hogi jab atwar mein

muttahid hai kitna bhaarat dahr ko batlaenge

azmat-e-jamhuriyat duniya ko hum dikhlaenge

ek hi diwar ke sae mein hain dair-o-haram

han wahi bhaarat hai ye jo amn ki taswir hai

gautam-o-gandhi jawahar-lal aur aazad ne

dekha tha jo KHwab pahron us ki ye tabir hai

kah do duniya se hasin kirdar bhi ab sikh le

aae hum se amn ke atwar bhi ab sikh le

aaj wo din hai ki jis din ke liye the KHun bahe

chandr-shekhar aur bhagat-singh aur phir gandhi ke KHun

aur han jauhar ali muKHtar-o-sayyad the wahi

tha sada jin ke dilon se sar kaTane ka junun

desh ki KHatir hua jin ka janam aur maut bhi

maut jin ki maut pe roti rahi roti rahi