angDai

ek dhīmī sī garaj alhaḌ ghaTā uThtī huī

saaz ke siine se saut-e-be-sadā uThtī huī

rang kī ik jū-e-bār

parda jaise ḳhāna-e-tasvīr kā uThtā huā

jaise joban shoḳhi-e-tahrīr kā uThtā huā

'unfuvān-e-zar-nigār

barbat-e-nashv-o-numā kī ek matvālī tarang

gūñjte ā'sāb khiltā rang bajte ang ang

garm mausam kā nikhār

avvalīñ barsāt ke pahle tarashshoh kā samāñ

nāchte jazbāt se labrez idrāk-e-javāñ

be-nihāyat be-shumār

zindagī kī ḳhvāhishāt-e-garm kā vahshī chakor

raqs meñ Duubā huā ḳhud-mast be-ārām mor

ek aahū ik chinār

ek dhimi si garaj alhaD ghaTa uThti hui

saz ke sine se saut-e-be-sada uThti hui

rang ki ek ju-e-bar

parda jaise KHana-e-taswir ka uThta hua

jaise joban shoKHi-e-tahrir ka uThta hua

'unfuwan-e-zar-nigar

barbat-e-nashw-o-numa ki ek matwali tarang

gunjte aa'sab khilta rang bajte ang ang

garm mausam ka nikhaar

awwalin barsat ke pahle tarashshoh ka saman

nachte jazbaat se labrez idrak-e-jawan

be-nihayat be-shumar

zindagi ki KHwahishat-e-garm ka wahshi chakor

raqs mein Duba hua KHud-mast be-aram mor

ek aahu ek chinar