apna apna rang

tū hai ik tāñbe kā thaal

jo sūraj kī garmī meñ saarā saal tape

koī halkā niilā bādal jab us par būñdeñ barsā.e

ek chhanākā ho aur būñdeñ bādal ko uḌ jaa.eñ

tāñbā jaltā rahe

vo hai ik bijlī kā taar

jis ke andar tez aur ātishnāk ik barqī-rau dauḌe

jo bhī us ke paas se guzre

us kī jānib khīñchtā jaa.e

us ke saath chimaT ke maut ke jhūle jhūle

barqī-rau vaisī hī sur.at aur tezī se dauḌtī jaa.e

maiñ hoñ barg-e-shajar

sūraj chamke maiñ us kī kirnoñ ko apne ruup meñ dhārūñ

bādal barse maiñ us kī būñdeñ apnī rag rag meñ utārūñ

baad chale maiñ us kī lahroñ ko naġhmoñ meñ Dhālūñ

aur ḳhizāñ aa.e to us ke muñh meñ apnā ras Tapkā kar peḌ se utrūñ

dhartī meñ mudġham ho jā.ūñ

dhartī jab mujh ko ugle to paudā ban kar phūTūñ

tu hai ek tanbe ka thaal

jo suraj ki garmi mein sara sal tape

koi halka nila baadal jab us par bunden barsae

ek chhanaka ho aur bunden baadal ko uD jaen

tanba jalta rahe

wo hai ek bijli ka tar

jis ke andar tez aur aatishnak ek barqi-rau dauDe

jo bhi us ke pas se guzre

us ki jaanib khinchta jae

us ke sath chimaT ke maut ke jhule jhule

barqi-rau waisi hi surat aur tezi se dauDti jae

main hon barg-e-shajar

suraj chamke main us ki kirnon ko apne rup mein dhaarun

baadal barse main us ki bunden apni rag rag mein utarun

baad chale main us ki lahron ko naghmon mein Dhaalun

aur KHizan aae to us ke munh mein apna ras Tapka kar peD se utrun

dharti mein mudgham ho jaun

dharti jab mujh ko ugle to pauda ban kar phuTun