apna saya

jismoñ ke kho jaane

aur ruuoñ ke badalne ke karb ne mujhe tamām-umr

andesha-e-ziyā.a meñ hī mubtalā rakhā

kal ke din ne mujh meñ base sab ḳhauf maar diye

chehre se naqāb utrā to sachchā.ī siina taane mere sāmne aa khaḌī huī

ḳhud se bichhḌī huī thī ab ḳhud se aa milī huuñ

merā saaya mujh meñ nau phaTā ho kar jaag gayā hai aur

vo merā haath thāme baiThā hai

ab vahī mor-pañkh vahī jhiil vahī murġhābī ke bachche

aḳhroT khātī gilahrī aur rañg bikhertī titlī

merā saaya

yahī sab murda manāzir ko mere andar hanūt kar ke baiTh gayā hai

ab apne hī saa.e kī panāh meñ huuñ

jis ke na badalne kā Dar na bichhaḌne kā vahm

ek sā bas mujh meñ hī rahegā

merā hī rahegā

is liye

ab tanhā.ī se Dar nahīñ lagtā

ab judā.ī se Dar nahīñ lagtā

ab maiñ apnī panāh meñ huuñ

jismon ke kho jaane

aur ruon ke badalne ke karb ne mujhe tamam-umr

andesha-e-ziyaa mein hi mubtala rakha

kal ke din ne mujh mein base sab KHauf mar diye

chehre se naqab utra to sachchai sina tane mere samne aa khaDi hui

KHud se bichhDi hui thi ab KHud se aa mili hun

mera saya mujh mein nau phaTa ho kar jag gaya hai aur

wo mera hath thame baiTha hai

ab wahi mor-pankh wahi jhil wahi murghabi ke bachche

aKHroT khati gilahri aur rang bikherti titli

mera saya

yahi sab murda manazir ko mere andar hanut kar ke baiTh gaya hai

ab apne hi sae ki panah mein hun

jis ke na badalne ka Dar na bichhaDne ka wahm

ek sa bas mujh mein hi rahega

mera hi rahega

is liye

ab tanhai se Dar nahin lagta

ab judai se Dar nahin lagta

ab main apni panah mein hun