apne logon ke nam

ġharīb logo, sitam-gazīda ajiib logo

tumhārī āñkheñ jo muntazir haiñ

ki koī īsā-nafas tumhāre

burīda ḳhvāboñ kī laash uThā kar

paḌhegā phir se vo ism-e-āzam

ki jis se ye ḳhvāb jī uTheñge

ġharīb logo, sitam-gazīda ajiib logo

ye jaan lo tum, ki vo payambar

diloñ meñ maujūd hai tumhāre

tum apne baazū kamāñ karoge

tum apne siine sipar karoge

to phir vo īsā-nafas tumhāre

burīda ḳhvāboñ ko zindagī kī naved degā

agar yūñhī sar jhuke rahe to

ġhanīm is baar ḳhvāb kyā haiñ

tumhārī āñkheñ hī noch legā

tumhārī āñkhoñ meñ jo sharāre haiñ

vo sharāre nahīñ raheñge

tumhāre pyāre nahīñ raheñge

ġharīb logo, sitam-gazīda ajiib logo

uTho ki ab vaqt aa gayā hai

gharib logo, sitam-gazida ajib logo

tumhaari aankhen jo muntazir hain

ki koi isa-nafas tumhaare

burida KHwabon ki lash uTha kar

paDhega phir se wo ism-e-azam

ki jis se ye KHwab ji uThenge

gharib logo, sitam-gazida ajib logo

ye jaan lo tum, ki wo payambar

dilon mein maujud hai tumhaare

tum apne bazu kaman karoge

tum apne sine sipar karoge

to phir wo isa-nafas tumhaare

burida KHwabon ko zindagi ki nawed dega

agar yunhi sar jhuke rahe to

ghanim is bar KHwab kya hain

tumhaari aankhen hi noch lega

tumhaari aankhon mein jo sharare hain

wo sharare nahin rahenge

tumhaare pyare nahin rahenge

gharib logo, sitam-gazida ajib logo

uTho ki ab waqt aa gaya hai