apni bad-surati par ek nazm

bhale hī bad-numā huuñ maiñ

bahut hī bad-numā huuñ maiñ

mire chehre pa lā-tā'dād dhabbe haiñ

mirī rangat bahut kaalī bahut kaalī

maiñ ban-mānus sā dikhtā huuñ

magar phir bhī

maiñ apnī maañ kī nazroñ meñ

mah-e-kāmil ke jaisā huuñ

maiñ apne baap kī āñkhoñ kā taara huuñ

maiñ apne naanā naanī kā dulārā huuñ

mirā daadā mujhe shahzād kahtā hai

mirī daadī mujhe mahtāb kahtī hai

mirī phuppo mire dīdār ko betāb rahtī hai

mirī ḳhāla mujhe apne pisar se kam nahīñ rakhtī

mire chāchū ko behad pyaar hai mujh se

mire māmūñ ko duniyā meñ koī mujh sā nahīñ lagtā

mirī bahneñ mire bhaa.ī

vo mujh par naaz karte haiñ

aur in sab logoñ se baḌh kar

vo hastī hai

ki sattar maaoñ se baḌh kar jise mujh se mohabbat hai

to achchhā thā

mirī sūrat pe koī tabsira karne se pahle tum inheñ bhī dhyān meñ rakhte

bahut hassās dil hai jin ke siine meñ

jinheñ maiñ jaañ se pyārā huuñ

ḳhudā kā ḳhauf to karte

ki sattar maaoñ se baḌh kar vo mujh se pyaar kartā hai

bhale hi bad-numa hun main

bahut hi bad-numa hun main

mere chehre pa la-ta'dad dhabbe hain

meri rangat bahut kali bahut kali

main ban-manus sa dikhta hun

magar phir bhi

main apni man ki nazron mein

mah-e-kaamil ke jaisa hun

main apne bap ki aankhon ka tara hun

main apne nana nani ka dulara hun

mera dada mujhe shahzad kahta hai

meri dadi mujhe mahtab kahti hai

meri phuppo mere didar ko betab rahti hai

meri KHala mujhe apne pisar se kam nahin rakhti

mere chachu ko behad pyar hai mujh se

mere mamun ko duniya mein koi mujh sa nahin lagta

meri bahnen mere bhai

wo mujh par naz karte hain

aur in sab logon se baDh kar

wo hasti hai

ki sattar maon se baDh kar jise mujh se mohabbat hai

to achchha tha

meri surat pe koi tabsira karne se pahle tum inhen bhi dhyan mein rakhte

bahut hassas dil hai jin ke sine mein

jinhen main jaan se pyara hun

KHuda ka KHauf to karte

ki sattar maon se baDh kar wo mujh se pyar karta hai