apni talash mein nikle

bahut gumān hai apne vajūd kā mujh ko

magar koī bhī haqīqat ayaañ nahīñ mujh par

ḳhizāñ-rasīda kisī barg-e-nā-tavāñ kī tarah

gumān ye ki safar mere iḳhtiyār meñ hai

mujhe to ye bhī nahīñ ilm kyā hai merī zaat

maiñ jis ko DhūñDh rahā huuñ vo kaun hai kyā hai

vo chāhtā hai use DhūñDh luuñ agar maiñ bhī

koī nishān koī raushnī to lāzim hai

to is haqīqat-e-maḳhfī ko jānñe ke liye

chalo ḳhudā se koī baat kar ke dekhte haiñ

agar ye parda-nashīnī hī baaqī rakhnī hai

agar talāsh kā ye imtihān jaarī hai

to mere dīda-e-shab ke sukūn kī ḳhātir

atā kare koī hikmat koī hunar aisā

ki jab maiñ jāgūñ

to as.hāb-e-kahf kī mānind

na koī parda na ib.hām ho mire aage

vo vaqt aa.e ki mujh se vo zaat khul jaa.e

mire nasīb se ik āgahī kā daur mile

mire vajūd se ye kā.enāt khul jaa.e

chalo usī se pata us kā pūchh lete haiñ

chalo ḳhudā se koī baat kar ke dekhte haiñ

bahut guman hai apne wajud ka mujh ko

magar koi bhi haqiqat ayan nahin mujh par

KHizan-rasida kisi barg-e-na-tawan ki tarah

guman ye ki safar mere iKHtiyar mein hai

mujhe to ye bhi nahin ilm kya hai meri zat

main jis ko DhunDh raha hun wo kaun hai kya hai

wo chahta hai use DhunDh lun agar main bhi

koi nishan koi raushni to lazim hai

to is haqiqat-e-maKHfi ko jaanne ke liye

chalo KHuda se koi baat kar ke dekhte hain

agar ye parda-nashini hi baqi rakhni hai

agar talash ka ye imtihan jari hai

to mere dida-e-shab ke sukun ki KHatir

ata kare koi hikmat koi hunar aisa

ki jab main jagun

to ashab-e-kahf ki manind

na koi parda na ibham ho mere aage

wo waqt aae ki mujh se wo zat khul jae

mere nasib se ek aagahi ka daur mile

mere wajud se ye kaenat khul jae

chalo usi se pata us ka puchh lete hain

chalo KHuda se koi baat kar ke dekhte hain