asasa

maiñ apnī qīmtī chīzeñ bhī aksar bhuul jaatī huuñ

kahīñ bhī jā ke Thahrūñ maiñ

kisī ke paas bhī jā.ūñ

kabhī terrace kabhī āñgan kabhī kamre meñ bhī aksar

kuchh apnī pichhlī yādoñ ko kabhī kuchh chāñd rātoñ ko

aur aksar adh-bune se kuchh adhūre ḳhvāb ke guchchhe

vahīñ par chhoḌ aatī huuñ

maiñ aksar bhuul jaatī huuñ

vo jo maiñ āḳhirī mausam meñ tum se milne aa.ī thī

to kuchh taare chamelī kī bahut thoḌī sī vo ḳhushbū

mohabbat ke sunahrī narm resham se bane be-sāḳhta jumle

yahīñ par rah ga.e mere

yahāñ dīvār par maiñ ne chamaktā chāñd chhoḌā thā

hañsī ke motiyoñ kī ek maalā thī jo tum ne gift meñ dī thī

yahīñ par rah ga.ī vo bhī

maiñ Thahrūñgī nahīñ mujh ko bas apnī qīmtī chīzeñ hī lenī haiñ

tumheñ zahmat bahut hogī magar ye sab mujhe de do

tumhāre paas to duniyā ke ab saare ḳhazāne haiñ

maiñ ḳhālī haath baiThī huuñ yahī merā asāsa hai

main apni qimti chizen bhi aksar bhul jati hun

kahin bhi ja ke Thahrun main

kisi ke pas bhi jaun

kabhi terrace kabhi aangan kabhi kamre mein bhi aksar

kuchh apni pichhli yaadon ko kabhi kuchh chand raaton ko

aur aksar adh-bune se kuchh adhure KHwab ke guchchhe

wahin par chhoD aati hun

main aksar bhul jati hun

wo jo main aaKHiri mausam mein tum se milne aai thi

to kuchh tare chameli ki bahut thoDi si wo KHushbu

mohabbat ke sunahri narm resham se bane be-saKHta jumle

yahin par rah gae mere

yahan diwar par main ne chamakta chand chhoDa tha

hansi ke motiyon ki ek mala thi jo tum ne gift mein di thi

yahin par rah gai wo bhi

main Thahrungi nahin mujh ko bas apni qimti chizen hi leni hain

tumhein zahmat bahut hogi magar ye sab mujhe de do

tumhaare pas to duniya ke ab sare KHazane hain

main KHali hath baiThi hun yahi mera asasa hai