asia ki mazdur aurat

taġhārī sar pe dhare tar-ba-tar pasīne se

uThā.e māmtā kā bojh nau mahīne se

dahaktī ret pe apne qadam jamā.e hue

mashaqqatoñ kī nazar se nazar milā.e hue

rutoñ ke qahr ko ye imtihān lagtī hai

ye chāñdnī se banī ik chaTān lagtī hai

hunar kī chādar-e-bā-zeb us ne pahnī hai

ma.āshiyāt kī pāzeb us ne pahnī hai

phaTe libās pe mehnat kī shaal oḌhe hai

badan ke shīshe pe lohe kā jaal oḌhe hai

har ik makān kī buniyād us ne Daalī hai

gharoñ kī shaukat-o-azmat usī kī paalī hai

vo jis kalā.ī pe be-himmatī ke ta.ane haiñ

usī ke panje meñ tāqat ke tāne-bāne haiñ

machān bāñdh ke jab chhat banā.ī jā.egī

taġhārī sar pe cement kī yahī uThā.egī

chaḌhegī zīna-ba-zīna sameTtī saarī

agarche bojh bhī bhārī hai pair bhī bhārī

ye jhuTpuTe ko thakī-hārī ghar jo jā.egī

to apne kumbe kī har bhuuk ye miTā.egī

ye yuuñ to piiTh pe patthar uThā ke chaltī hai

zamām-e-kār ko qabze meñ karke chaltī hai

kabhī kudāl chalātī hai bojh Dhotī hai

to hal chalā ke kabhī ye zamīn botī hai

kabhī ye ghar kī gavāhī meñ jaan detī hai

haveliyoñ ko itā.at kā maan detī hai

ġharīb hai so badan kā ḳhirāj detī hai

ye ḳhud ko piis ke ghar ko anaaj detī hai

ye be-bisāt hai lekin ye ġham-gusār bhī hai

vafā-shi.ār bhī hai jān-e-rozgār bhī hai

taghaari sar pe dhare tar-ba-tar pasine se

uThae mamta ka bojh nau mahine se

dahakti ret pe apne qadam jamae hue

mashaqqaton ki nazar se nazar milae hue

ruton ke qahr ko ye imtihan lagti hai

ye chandni se bani ek chaTan lagti hai

hunar ki chadar-e-ba-zeb us ne pahni hai

maashiyat ki pazeb us ne pahni hai

phaTe libas pe mehnat ki shaal oDhe hai

badan ke shishe pe lohe ka jal oDhe hai

har ek makan ki buniyaad us ne Dali hai

gharon ki shaukat-o-azmat usi ki pali hai

wo jis kalai pe be-himmati ke tane hain

usi ke panje mein taqat ke tane-bane hain

machan bandh ke jab chhat banai jaegi

taghaari sar pe cement ki yahi uThaegi

chaDhegi zina-ba-zina sameTti sari

agarche bojh bhi bhaari hai pair bhi bhaari

ye jhuTpuTe ko thaki-haari ghar jo jaegi

to apne kumbe ki har bhuk ye miTaegi

ye yun to piTh pe patthar uTha ke chalti hai

zamam-e-kar ko qabze mein karke chalti hai

kabhi kudal chalati hai bojh Dhoti hai

to hal chala ke kabhi ye zamin boti hai

kabhi ye ghar ki gawahi mein jaan deti hai

haweliyon ko itaat ka man deti hai

gharib hai so badan ka KHiraj deti hai

ye KHud ko pis ke ghar ko anaj deti hai

ye be-bisat hai lekin ye gham-gusar bhi hai

wafa-shiar bhi hai jaan-e-rozgar bhi hai