asir kar nahin sakta

asiir kar nahīñ saktā inheñ koī mausam

ye log apne zamāne se aage chalte haiñ

kahīñ Thaharte nahīñ ye kisī bhī aalam meñ

ye uḌte lamhoñ kī raftār ko badalte haiñ

ye bandagān-e-mohabbat haiñ in kī barakat se

bisāt-e-dil pe hazāroñ charāġh jalte haiñ

inhīñ kā faiz inhīñ kā karam hai bastī meñ

ki log raqs-kunāñ haiñ surūr-o-mastī meñ

mahak rahe haiñ diloñ ke hazār kāshāne

utar rahī hai gharoñ meñ ye raushnī kī barāt

bikhar rahī hai fazā-e-zamīn ḳhush-auqāt

khile khile haiñ rah-e-zindagī ke sab ashjār

hayāt baañT rahī hai bahār kī sauġhāt

asir kar nahin sakta inhen koi mausam

ye log apne zamane se aage chalte hain

kahin Thaharte nahin ye kisi bhi aalam mein

ye uDte lamhon ki raftar ko badalte hain

ye bandagan-e-mohabbat hain in ki barakat se

bisat-e-dil pe hazaron charagh jalte hain

inhin ka faiz inhin ka karam hai basti mein

ki log raqs-kunan hain surur-o-masti mein

mahak rahe hain dilon ke hazar kashane

utar rahi hai gharon mein ye raushni ki baraat

bikhar rahi hai faza-e-zamin KHush-auqat

khile khile hain rah-e-zindagi ke sab ashjar

hayat banT rahi hai bahaar ki saughat