asli naqli

na kirdār aslī na guftār aslī

ho kis tarah duniyā meñ byopār aslī

election meñ jiite haiñ rishvat ke bal pe

vo kaise banā.eñge sarkār aslī

black market har jagah khul rahe haiñ

na hai jins aslī na bāzār aslī

inān-e-hukūmat hai qabze meñ jin ke

haqīqat meñ haiñ vo hī be-kār aslī

milāvaT kā hai duudh aur ghaas kā ghī

na ġhalle ke milte haiñ ambār aslī

banā.e hue haiñ mashīnoñ ke insān

muālij haiñ aslī na bīmār aslī

haiñ aksar avāriz kī ḳhāliq davā.eñ

na rakkhe taraqqī ne āzār aslī

na hamdard aslī na ġham-ḳhvār koī

jahāñ dekho milte haiñ makkār aslī

banā.ī hai māshūq ne naqlī sūrat

to ho kis tarah āshiq-e-zār aslī

ye mizhgān-o-abrū banā.e hue haiñ

na haiñ zulfeñ aslī na ruḳhsār aslī

hai be-kār ab asliyat kī tamanna

nahīñ haiñ parakhne ke me.aar aslī

zamīñ to zamīñ āsmāñ pe bhī ab to

savābit haiñ aslī na sayyār aslī

na kirdar asli na guftar asli

ho kis tarah duniya mein byopar asli

election mein jite hain rishwat ke bal pe

wo kaise banaenge sarkar asli

black market har jagah khul rahe hain

na hai jins asli na bazar asli

inan-e-hukumat hai qabze mein jin ke

haqiqat mein hain wo hi be-kar asli

milawaT ka hai dudh aur ghas ka ghi

na ghalle ke milte hain ambar asli

banae hue hain mashinon ke insan

mualij hain asli na bimar asli

hain aksar awariz ki KHaliq dawaen

na rakkhe taraqqi ne aazar asli

na hamdard asli na gham-KHwar koi

jahan dekho milte hain makkar asli

banai hai mashuq ne naqli surat

to ho kis tarah aashiq-e-zar asli

ye mizhgan-o-abru banae hue hain

na hain zulfen asli na ruKHsar asli

hai be-kar ab asliyat ki tamanna

nahin hain parakhne ke mear asli

zamin to zamin aasman pe bhi ab to

sawabit hain asli na sayyar asli